Փաստ ինֆո

«Հայաստանում կա մեկ միլիոնից ավելի աղքատ մարդ, բայց բոլոր սոցհարցումներով ՀՀ քաղաքացիների գերակշիռ մեծամասնությունը առաջնահերթ իրենց դժգոհությունների շարքում մատնանշում են ոչ թե իրենց սոցիալական կարգավիճակը, աղքատությունը կամ գործազրկությունը, այլ մատնաշում են անարդարությունը, կոռուպցիան դատական համակարգում, իրավապահ համակարգի հանդեպ ունեցած անվստահությունը»,- Ազգային ժողովի այսօրվա նիստում` «2013 թվականի ընթացքում Հայաստանի Հանրապետության մարդու իրավունքների պաշտպանի գործունեության և երկրում մարդու իրավունքների ու հիմնարար ազատությունների խախտման մասին» տարեկան զեկույցի քննարկման ժամանակ հայտարարեց «Բարգավաճ Հայաստան» խմբակցության քարտուղար Նաիրա Զոհրաբյանը:

Ըստ նրա` բնական է, որ ՄԻՊ-ի զեկույցում «կարմիր թելով» անցնում են վերոհիշյալ խնդիրները: «Դա միանգամայն բնական, օրինաչափ և տրամաբանական է, որովհետև չեմ կարծում, որ ՀՀ-ում կգտնվի մեկ քաղաքացի, ով կհավատա, որ մեր դատական համակարգն արդար է և  ով կհավատա, որ Հայաստանի դատարանները քաղաքական պատվեր չեն կատարում: Եթե կգտնվի նման քաղաքացի, ապա մենք այդ քաղաքացուն կներկայացնենք Գինեսի ռեկորդների գրքում՝ որպես բացառիկ այլ տրամաբանություն ունեցող քաղաքցի»,- ընդգծեց Ն.Զոհրաբյանը:

Ն.Զոհրաբյանը հավելեց նաև, որ «այլապես հնարավոր չէ որևէ սթափ տրամաբանությամբ բացատրել, թե ինչպես է հնարավոր մի անչափահաս երիտասարդի` Շահեն Հարությունյանի, օրինակ, հասկանալի չէ, թե ինչի համար, դատապարտել թեկուզ չորս տարի, թեկուզ պայմանական ազատազրկման, մինչդեռ մեկ այլ երիտասարդի` Սյունաց արքունիքից, խիստ կոնկրետ հանցագործության համար մեկ օր անգամ պատժի չենթարկել»` նկատի ունենալով Սյունիքի մարզպետ Սուրիկ Խաչատրյանի որդուն:

Ն.Զոհրաբյանը երկու առաջարկ ներկայացրեց ՄԻՊ-ին, որոնց ԲՀԿ-ականները հանգել են քրեակատարողական հիմնարկներում իրականացված մոնիթորինգի արդյունքում:

«Խոսքը վերաբերում է  պայմանական վաղաժամկետ ազատ արձակման «անկախ հանձնաժողովի» գործունեությանը, որն ուղղակի կատարյալ խայտառակություն է»,- նշեց նա:

Երկրորդ խնդիրը վերաբերում էր ժամանակավոր պահման խցերի խայտառակ, անմարդկային պայմաններին, երբ մեկ խցում 20-30 մարդ է պահվում: