Փաստ ինֆո

Ոստիկանության համակարգում «ֆինանսական բուրգի» գործով այսօրվա դատական նիստում ամբաստանյալ Արթուր Անդրեասյանի դատաբժշկական փորձաքննությունը կատարած փորձագետներից մեկը՝ Գագիկ Հարությունյանը հայտարարեց, որ ամբաստանյալի գլխուղեղի շրջանում կիստայի չափերի առկա մեծացումը էական նշանակություն չունի՝ հիվանդության ծանրագույն բարդացում արձանագրելու համար, այն զուտ ունի նշանակություն բուժական առումով:

Փորձագետը նշեց նաև, որ ոչ ոք չի կարող կանխագուշակել, թե երբ ու ինչպիսի տենդենցներ այս կամ այն մարդու մոտ կարող են լինել:   
Փորձագետն ընդգծեց, որ ամբաստանյալի մոտ առկա են զգացողական և ոչ թե՝ շարժողական խանգարումներ: Միջգերատեսչական հանձնաժողովի կազմում եղել է նաև նյարդաբան մասնագետ, և եթե նա գտներ, որ անհրաժեշտ է լրացուցիչ հետազոտություն անցկացնել, այդպիսիք կանցկացվեին:

Փորձագետը պնդեց իրենց եզրակացության հետևությունն առ այն, որ Արթուր Անդրեասյանի հիվանդությունն այս պահին չի կարող առաջացնել հոգեկան հիվանդություն, ինչպես նաև՝ ցանկացած այլ հիվանդություն կամ մահ:

Ամբաստանյալի պաշտպան  Մնացական Սարգսյանը հիշեցրեց, որ ըստ քրեակատարողական հիմնարկի պետի գրության, ամբաստանյյալի մոտ առկա է բացասական դինամիկա: Ըստ պաշտպանի՝ փորձաքննության եզրակացության մեջ չի նշվում, թե ում կողմից, երբ ու ինչ մեթոդիկայով է կատարվել փորձաքննությունը:

Մնացական Սարգսյանը միջնորդեց նշանակել կրկնակի դատաբժշկական փորձաքննություն. դատարանը մերժեց  միջնորդությունը՝  հիմնվելով նաև փորձագետի հիշյալ հարցաքննության վրա:

Դատական նիստում ցուցմունքներ տվեց գործով տուժող, «ՎՏԲ բանկ»-ի աշխատակից Երվանդ Ներսիսյանը: Նա հայտնեց, որ երբ ինքը աշխատում էր «Յունիբանկում», Արթուր Անդրեասյանը դիմել է հիպոթեքային վարկ ստանալու համար՝ ներկայացնելով 170  հազար դոլար վարկի հայտ: Բանկը հայտը բավարարել է 130 հազար դոլարի չափով: Ըստ տուժողի՝ մինչ վարկը տրամադրելը կատարվել է  տեղազննություն, պահանջվել են փաստաթղթեր, այդ թվում՝ ֆիսկալ հաշվետվություններ:

Մեկ տարի անց Արթուր Անդրեասյանը նորից է դիմել՝ այս անգամ 40 հազար դոլարի սպառողական վարկ ստանալու համար: Հաշվի առնելով Արթուր Անդրեասյանի վարկային «մաքուր» պատմությունը՝ տուժողն Արթուր Անդրեասյանին է վստահել նաև սեփական միջոցները՝ 120  հազար դոլար՝ 1,6 տոկոսով, ընդհանուր առմամբ ամբաստանյալը վճարել է 11 900 դոլար կազմող տոկոսները:

Մինչև այժմ ամբաստանյալը, ըստ տուժողի, մայր գումարը չի վերադարձրել: Սկզբնապես ամբաստանյալը, հիշատակելով բարձրաստիճան պաշտոնատար անձանց հետ՝ Երևանի նախկին ոստիկանապետ Ներսիկ Նազարյանի (Ներսիկ Նազարյանը Արթուր Անդրեասյանի կնքահայրն է)  ու Շիրակի նախկին ոստիկանապետ Կարեն Բաբակեխյանի հետ իր կապերը, ասել է, որ բիզնեսում խնդիրներ չկան ու չեն կարող լինել: 

Սակայն ավելի ուշ Արթուր Անդրեասյանն ասել է, որ պաշտոնատար անձինք բարձր տոկոսներով պարտք են տվել իրեն, ինքը սխալ է  հաշվարկել բիզնեսը և մեծ պարտքեր կուտակել, մասնավորապես՝ Բաբակեխյաններն էլ իրենից «խլել են» իր տարածքը՝ պարտքերի դիմաց:

Տուժողը վստահ է, որ Արթուր Անդրեասյանը խաբեությամբ տիրացել է իր գումարներին, և դրանք գտնվում են շրջանառության մեջ` Ներսիկ Նազարյանի որդուն՝ Արմեն Նազարյանին պատկանող «Մոսկվիչկա» խանութների ցանցի փոխանակման կետերում, ու եկամուտներ են բերում:

Թեև քննությունը գտել է, որ «Մոսկվիչկաները կապ չունեն», տուժողը համաձայն չէ այդ գնահատականի հետ, բողոք է ներկայացրել այդ որոշման դեմ ու մերժվել:

Տուժողը պնդեց, որ Արթուր Անդրեասյանն իրեն ասել է, որ հիշյալ խանութների ցանցում գործող «փոխանակման կետերն իմն են, ես եմ աշխատեցնում»: Ավելին, փոխանակման կետերի աշխատողներից լսել է, որ մեծ գործարքների դեպքում անհրաժեշտ է դիմել տնօրենին՝ Արթուրին:

Ամսվա կտրվածքով Արթուր Անդրեասյանը, ըստ նրա, երեք փոխանակման կետերից ուներ 9 մլն դրամի եկամուտ:  

Տուժողը հերքեց իր իսկ նախաքննական ցուցմունքում պնդումը, թե Արթուր Անդրեասյանը «Եվրոֆուտբոլ»-ով խաղադրույքներ է տանուլ տվել, ըստ տուժողի՝ դա քննիչի ուղղորդման արդյունքն է: 
 
Տուժողը պնդեց իր գումարային պահանջն ամբաստանյալից՝ 120 հազար դոլարի չափով: