Փաստ ինֆո

Տարբեր օտարերկրյա քաղաքացիների բանկային քարտերի հաշիվներից հափշտակված զգալի չափերով գումարն օրինականացնելու վերաբերյալ գործով կայացվել է մեղադրական դատավճիռ:  
 
Դատարանն ապացուցված է համարել, որ ՀՀ քաղաքացի, 25-ամյա Արմեն Սադովնիչիյը, 2013 թվականի հոկտեմբերի 25-ին համացանցի միջոցով իմանալով թվով 4 օտարերկրացիների բանկային քարտերի ամբողջական տվյալները, համակարգչային տեխնիկայի օգտագործմամբ նշված քարտերի հաշիվներից հափշտակել է զգալի չափերով` 283.600 ՀՀ դրամ գումար: Ապա հանցավոր ճանապարհով ստացված եկամուտների ծագման աղբյուրը, տեղաշարժը թաքցնելու և խեղաթյուրելու նպատակով կատարել է մի շարք բանկային և այլ փոխանցումներ ու փոխարկումներ, այդ թվում`օգտագործելով էլեկտրոնային վճարային համակարգեր, այնուհետև կանխիկացրել և տնօրինել է հափշտակված գումարները, որով իսկ օրինականացրել է դրանք։

Այսպես, նպատակ ունենալով վերոհիշյալ բանկային քարտերի հաշվեհամարներից գումարներ հափշտակել, ապա՝ դրանց ծագման աղբյուրը և տեղաշարժը թաքցնելով և խեղաթյուրելով օրինականացնել, նախապես, մինչև գումարների հափշտակությունը, համացանցի «www.facebook» և  «www. odnoklassniki.ru» սոցիալական կայքերում տեղադրել է աշխատանքի առաջարկի հայտարարություն` ներկայացնելով, թե իբր «Վեստիբյուլար» անվամբ կազմակերպությունն աշխատանքի է հրավիրում համագործակցել ցանկացող անձանց` օրական 5000 ՀՀ դրամ աշխատավարձով, որի արդյունքում հավաքագրել է ՀՀ երեք քաղաքացիների և հասանելիություն ստացել «Իդրամ» համակարգում գրանցված նրանց հաշիվներին, դրանց տնօրինման համար պահանջվող գաղտնաբառերին և ֆինանսական գործարքներ իրականացնելու համար նախատեսված PIN ծածկագրերին: Դրանից հետո էլ՝ 2013 թվականի հոկտեմբերի 25-ին, հափշտակել է օտարերկրացիների բանկային քարտերի հաշիվներից զգալի չափերով` 283.600 ՀՀ դրամ գումար:

Հանցավոր ճանապարհով ստացված ընդհանուր 283.600 ՀՀ դրամ գումարի ծագումը թաքցնելու և խեղաթյուրելու նպատակով Ա.Սադովնիչիյը հափշտակված գումարներն ուղղակիորեն չի փոխանցել «WebMoney» համակարգի իր անվամբ հաշվեհամարին, այլ փոխանցել է «Իդրամ»  համակարգի հավաքագրված երեք ՀՀ քաղաքացիների հաշվեհամարներին, այնուհետև 283.600 ՀՀ դրամը փոխակերպելով 683 ԱՄՆ դոլարի՝ նույն օրը` 2014 թվականի հոկտեմբերի 25-ին, 584 ԱՄՆ դոլարը փոխանցել է «WebMoney» համակարգի իր կողմից օգտագործվող  էլեկտրոնային քսակին, իսկ 99 ԱՄՆ դոլարը` նույն համակարգի՝ իր կողմից օգտագործվող մեկ այլ էլեկտրոնային քսակին։

Փոխանցված 584 ԱՄՆ դոլար գումարը Ա.Սադովնիչիյը նույն օրը փոխանցել է իր էլեկտրոնային քսակին։ Արդյունքում՝ փոխանցումներից առաջացող պահումներով էլեկտրոնային քսակին մուտքագրվել է հանցավոր ճանապարհով ստացված 677 ԱՄՆ դոլար գումար, որը տնօրինել է իր հայեցողությամբ, մասնավորապես՝ կրկին փոխարկելով այդ գումարից 172.000 ՀՀ դրամ՝ 2013 թվականի հոկտեմբերի 25-ից 27-ն ընկած ժամանակահատվածում փոխանցել է «Իդրամ» համակարգի՝ իր հաշվին, իսկ մնացած մասն օգտագործել է համացանցում` վճարումներ կատարելով։

«Իդրամ» համակարգի՝ իր հաշվեհամարին պահվող 172.000 դրամից 8000 ՀՀ դրամն Ա.Սադովնիչիյն օգտագործել է՝ բջջային հեռախոսահամարը վերալիցքավորելու համար, իսկ 160.000 ՀՀ դրամը` 2013 թվականի հոկտեմբերի 29-ին փոխանցել է «Արարատ Բանկ» ՓԲ ընկերությունում բացված իր  դոլարային հաշվեհամարին, որը փոխակերպվել է 395 ԱՄՆ դոլար գումարի: Դրանից  հետո նույն օրն այն կանխիկացրել է «Արարատ Բանկ» ՓԲ ընկերության Էջմիածին քաղաքի մասնաճյուղում, որով իսկ հանցավոր ճանապարհով ստացված այդ գումարներն օրինականացվել են։

Առաջադրված մեղադրանքում ամբաստանյալը, քրեական գործի նախաքննությամբ, իրեն մեղավոր է ճանաչել լիովին, զղջացել է կատարածի համար, նրա դիրքորոշումը չի փոխվել նաև դատական քննության ընթացքում: Ամբաստանյալի միջնորդությամբ՝ գործը քննվել է արագացված դատաքննության կարգով:

Դատավճռով ամբաստանյալ Արմեն Սադովնիչիյը մեղավոր է ճանաչվել ՀՀ քրեական օրենսգրքի 190-րդ  հոդվածի 1-ին մասով և դատապարտվել ազատազրկման՝ 2 տարի 6 ամիս ժամկետով, գույքի բռնագրավմամբ՝ 283.600 Հայաստանի Հանրապետության դրամին համարժեք։

Դատարանը` որպես պատասխանատվությունը և պատիժը մեղմացնող և անձը բնութագրող հանգամանքներ է դիտել այն, որ ամբաստանյալը զղջացել և զղջում է կատարածի համար, նախկինում դատված, արատավորված չի եղել, խնամքին են վատառողջ մայրը և թոշակառու տատը, ունի բարձրագույն կրթություն, բնութագրվում է դրականորեն։