Փաստ ինֆո

2014թ. ապրիլին Արարատի մարզի բնակիչ 42-ամյա  Նահապետյանը խեղդամահ էր արել սիրուհուն, ապա փորձել ինքնասպան լինել:

ինչպես ավելի վաղ «Փաստինֆո»-ն տեղեկացրել էր, դեպքի առթիվ հարուցվել էր քրեական գործ, սակայն մինչ նախաքննությունը կավարտվեր, Արարատի մարզի ընդհանուր իրավասության դատարանը որոշում է կայացրել քրեական գործի վարույթը կարճել և Հակոբ Նահապետյանի նկատմամբ քրեական հետապնդումը դադարեցնել:

Բանն այն է, որ օգոստոսի 14-ին Նահապետյանը կալանավայրում մահացել է: Որպես մահվան պատճառ՝ նշվում է «Կորոնար արյան շրջանառության սուր խանգարման» ախտորոշումը:

Դատարանի որոշման մեջ միաժամանակ նաև որոշ հանգամանքներ են նշվում, որոնք ինչ-որ չափով լույս են սփռում այս ողբերգական պատմության վրա:

Պարզվում է, որ  Նահապետյանը 2012 թվականի վերջերին ծանոթացել է Վեդի քաղաքի բնակչուհի Աննայի հետ: Նրանց միջև սիրային կապ է ձևավորվել, պարբերաբար հանդիպել են: Որոշ ժամանակ անց կինը, սակայն, սկսել է պահանջել, որ Նահապետյանն ամուսնալուծվի, հեռանա ընտանիքից և սկսի բնակվել իր հետ: Այդ հարցի շուրջ նրանց միջև կոնֆլիկտ է առաջացել, որի ընթացքում Աննան սկսել է զանգահարել  Նահապետյանի ընտանիքի անդամներին, իսկ 2013 թվականի ապրիլի 8-ին մանկահասակ դստեր հետ գնացել է նրանց տուն, որտեղ ընտանիքի անդամների ներկայությամբ վիճել է  Նահապետյանի հետ` պահանջելով ամուսնալուծվել կնոջից:

Հաջորդ օրը  Նահապետյանն իր «Ֆորդ Տրանզիտ» մակնիշի ավտոմեքենայով Աննայի հետ գնացել Է Արարատի մարզի Ուրցաձոր գյուղի «Խանումի Ձոր» կոչվող վայրից հեռու գտնվող ցորենի արտի մոտ` նախորդ օրը տեղի ունեցած միջադեպի շուրջ զրուցելու և նրա հետ հաշտության եզրեր գտնելու: Այստեղ սկսված վիճաբանության ընթացքում Աննան Նահապետյանի ընտանիքի հասցեին վիրավորական արտահայտություններ է արել, որոնք չհանդուրժելով՝ վերջինս սկսել է ձեռքերով հարվածել նրա դեմքին, գլխին ու կրծքավանդակին, իսկ հետո ձեռքերով սեղմել է պարանոցը և խեղդել:

Տեսնելով, որ սիրուհին մահացել է`  Նահապետյանն իր մոտ եղած խոհանոցային դանակով փորձել էր ինքնասպան լինել՝ հարվածելով ինքն իր կրծքավանդակին: Բայց դեպքի վայր հասած ոստիկանները նրան տեղափոխել էին Վեդիի հիվանդանոց: