Փաստ ինֆո

ՀՀ Քննչական կոմիտեից «Փաստինֆո»-ին հայտնեցին, որ Նախախորհրդարանի քարտուղարության անդամ Ալեք Ենիգոմշյանի հարևան Վահրամ Գաբրիելյանը բացատրություն է տվել և ազատ արձակվել:

Գաբրիելյանը հոկտեմբերի 19-ի երեկոյան` ժամը 23:00-ի սահմաններում, Արարատի քննչական վարչություն է բերման ենթարկվել ոստիկանության աշխատակիցների կողմից` ոստիկանության սերժանին հարվածելու հաղորդման հիման վրա նախապատրաստվող նյութերի շրջանակներում։ 

Ոստիկանության սերժանտը զեկուցագիր է ներկայացրել, որ հոկտեմբերի 19-ին՝ ժամը 12:00-ի սահմաններում, Շահումյան գյուղի կենտրոնական ճանապարհին ծագած վիճաբանության ժամանակ «ԲՄՎ» մակնիշի 21 ՏՍ 321 պետհամարանիշի ավտոմեքենայի վարորդին ներկայացել է որպես ոստիկանության սերժանտ, սակայն վերջինս հայհոյել է իրեն և հարվածել դեմքին:

Արարատի քննչական վարչությունում դեպքի առթիվ նյութեր են նախապատրաստվում, իսկ Վահրամ Գաբրիելյանը բացատրություն է տվել և հոկտեմբերի 20-ի ժամը 02:00-ի սահմաններում ազատ արձակվել:

Հիշեցնենք՝ նախախորհրդարանը հայտարարություն էր տարածել, որում ասվում էր, որ Նախախորհրդարանի քարտուղարության անդամ Ալեք Ենիգոմշյանը «100-ամյակն առանց ռեժիմի» իրազեկման ավտոերթի ավարտից հետո իր հարևանի հետ միասին՝ վերջինիս ավտոմեքենայով, տունդարձի ճանապարհին` «Սայաթ-Նովա փողոցում՝ Ֆրանսիայի հրապարակի հարակից հատվածում, նրանց ավտոմեքենային են մոտեցել մի խումբ անձինք՝ ներկայանալով որպես Ոստիկանության քրեական հետախուզության բաժնի աշխատակիցներ:

Նրանք Ալեք Ենիգոմշյանին կոպտորեն քաշքշելով դուրս են հանել ավտոմեքենայից, իսկ հարևանին բերման ենթարկել՝ մեքենայի հետ միասին»:

«Չնայած այն հանգամանքին, որ Ալեք Ենիգոմշյանը մի քանի անգամ կրկնել է, որ կույր է, չի տեսնում, ոստիկանության աշխատակիցները նրան թողել են փողոցի բանուկ հատվածում և հեռացել:

Որոշ ժամանակ անց պատահական անցորդներ մոտեցել են Ալեք Ենիգոմշյանին և դուրս բերել փողոցի բանուկ հատվածից»,- ասված է Նախախորհրդարանի տարածած հայտարարության մեջ: