Փաստ ինֆո

«2013 թվականի ընթացքում Հայաստանի Հանրապետության մարդու իրավունքների պաշտպանի գործունեության և երկրում մարդու իրավունքների ու հիմնարար ազատությունների խախտման մասին» տարեկան զեկույցի քննարկումն ընթացավ ոչ թե ըստ էության, «այլ՝ ով ինչ, այսպես չակերտներով, դարդ ու ցավ ուներ, փորձեց ներկայացնել, իբրև թե հասարակությունը կլսի դա, եզրակացություն կանի»: Այս տեսակետը խորհրդարանի նիստում հայտնեց ԱԺ նախագահ Գալուստ Սահակյանը՝ ընդգծելով, որ քաղաքական մեծամասնությունն այդ կարծիքին չէ:

Ըստ նրա՝ կարևորն այն է, որ ունենք Մարդու իրավունքների պաշտպանի ինստիտուտ, որը գնալով կայանում է: Նաև ընդգծեց, որ, ի տարբերություն ընդդիմադիր գործընկերների, իրենք բավականին դրական են գնահատում ՄԻՊ-ի գործունեությունը:

Նշենք, որ այսօրվա ելույթներում պատգամավորներն անդրադարձան տարբեր բնագավառներում մարդու իրավունքների խախտման դեպքերին՝ սկսած դատական համակարգից, այդ թվում՝ Շանթ Հարությունյանի և մյուսների գործով դատավճռից, վերջացրած ԱԺ զուգարանների դիմաց տեղադրված տեսախցիկների առատությունից:

«Մեր ժողովրդի մի զանգված կա, որն ընդհանրապես չի հավատում ո՛չ բարեփոխումներին, ո՛չ դատական համակարգին: Խոսում ենք և՛ դատաիրավական, և՛ տարբեր ոլորտների՝ առողջապության մասին: Բոլոր ոլորտներում էլ թերություններ կան, ինչպես արձանագրել է Վերահսկիչ պալատը: Այս ամենը մենք ունենք և դրա կողքին ավելի շատ խնդիրներ ունենք»,-հայտարարեց Գ.Սահակյանը:  

Նա նշեց նաև, որ ուզում է «խոսել խոսելու տակտի մասին». «Չի կարելի դատավորի դեր կատարել, կարելի է գնահատականներ տալ, քննադատել: Այս ամբիոնը դրա համար չէ»:

ԱԺ նախագահը դժգոհեց, որ ինչքան ԱԺ նիստը նախագահողը փորձում է «ինչ-որ ձևով բարեկրթություն մտցնել, միևնույն է՝ անպատվությունը, անկոռեկտությունը, իբրև թե հերոսացման պրոցեսով գնալը շարունակվում է»:

«Սա միտինգ չէ, սա օրենսդիր մարմին է: Սա այն մարմինն է, որը վճռական է մեր պետության հետագա բոլոր գործընթացների ճանապարհին: Այնպես որ, ես պիտի խնդրեմ, շատ կոռեկտ խոսել»,-հորդորեց նա:

«Ես բարեկրթության կողմնակից եմ որպես Ազգային ժողովի նախագահ: Ինձ մի թողեք, որպեսզի ես նիստերի ժամանակ գործեմ որպես Գալուստ Սահակյան, որովհետև ես էլ պատգամավոր եմ, կարող եմ այդ  մոտեցումներով ձևավորել իմ խոսքը: Ես Ազգային ժողովի նախագահ եմ և բոլորի համար եմ նախագահ, միայն ինձ համար նախագահ չեմ»,-ասաց ԱԺ նախագահ Գ.Սահակյանը՝ հավելելով. «Ես ուզում եմ, որ, բացի ընդդիմություն, դիմություն  լինելուց, դուք բոլորդ գործընկերներ եք և չափով, ձևով պիտի կարողանաք մեկդ մյուսի և՛ քննադատությունը տանել, և՛ գնահատականները տանել: Իսկ հայհոյանքը, բնականաբար, ոչ ոք չի տանելու»,-ընդգծեց ԱԺ նախագահը: