Փաստ ինֆո

«Վերնիսաժի» գործով նախաքննությունն ավարտվել է և քրեական գործն ուղարկվել է կողմերին` ծանոթանալու համար: Սակայն չի բացառվում, որ մինչ դատարան ուղարկվելը՝ գործի շրջանակներում կատարվեն նոր քննչական գործողություններ: Այս մասին «Փաստինֆո»-ի հետ զրույցում նշեց գործում որպես մեղադրյալ ներգրավված Աժ ԲՀԿ-ական պատգամավոր Կարո Կարապետյանի փեսայի՝ Գոռ Առաքելյանի փաստաբան Երեմ Սարգսյանը:

Փաստաբանը քննչական մարմնին մի շարք քննչական գործողություններ կատարելու միջնորդություն է ներկայացրել, որոնց բավարարման դեպքում գործի նախաքննությունը կարող է երկարել:

«Միջնորդության պատասխանից է կախված. եթե կբավարարեն՝ կբավարարեն, եթե կմերժեն, ապա արդեն կուղարկեն դատախազություն, որ ուղարկեն դատարան»,- ասաց փաստաբանը:

Երեմ Սարգսյանը հայտնեց, որ միջնորդել է առերեսումներ ու հեռախոսահամարների վերծանումներ կատարել, որոնց միջոցով, իր համոզմամբ, կարելի կլինի որոշ էական հանգամանքներ պարզել:

Առերեսման մասին «Փաստինֆո»-ի հարցին ի պատասխան` Երեմ Սարգսյանը նշեց. «Դրանք հարցաքննված անձանցից են, որոնց ցուցմունքներում էական հակասություններ կան, այդ թվում` վկաների»:

Հիշեցնենք` մայիսի 17-ին` ժամը 13:30-ի սահմաններում, Վերնիսաժի մոտ կրակոցներ էին հնչել, ինչի հետևանքով հրազենային վնասվածքներով հիվանդանոց էր տեղափոխվել 5 անձ: Ավելի ուշ պարզվեց, որ կրակողը եղել է ԱԺ ԲՀԿ խմբակցության պատգամավոր Կարո Կարապետյանի փեսան՝ 28-ամյա Գոռ Առաքելյանը:

Դեպքի օրը վիճաբանություն է սկսվել Գոռ Առաքելյանի և նրա ավտոմեքենայի ճանապարհը փակած Վալերի Հովհաննիսյանի և Նորայր Հարությունյանի միջև, որի արդյունքում Գոռ Առաքելյանը դուրս է եկել մեքենայից և մոտենալով նրանց՝ կրակել:

Գոռ Առաքելյանից բացի մեղադրանք է առաջադրվել նաև Վալերի Հովհաննիսյանին և Նորայր Հարությունյանին:

Ի դեպ, Գոռ Առաքելյանին նախապես առաջադրված սպանության փորձի և ապօրինի զենք-ռազմամթերք պահելու համար առաջադրված մեղադրանքը, Երևան քաղաքի քննչական վարչության Կենտրոնի քննչական բաժնում քննվող քրեական գործի շրջանակներում բոլորովին վերջերս մեղադրանքը լրացվել է ևս 2 հոդվածով` երկու և ավել անձանց առողջությանը ծանր, մեկ անձին՝ միջին ծանրության վնաս պատճառելու համար:

Փաստաբան Երեմ Սարգսյանն իր պաշտպանյալին առաջադրված մեղադրանքի հետ համաձայն չէ: Ըստ նրա՝ Գոռ Առաքելյանը Վալերի Հովհաննիսյանին սպանելու մտադրություն չի ունեցել, այլ գործել է անհրաժեշտ պաշտպանության վիճակում: