Փաստ ինֆո

2014թ. հունվարի 20-ին՝ ժամը 06:00-ի սահմաններում, Արմավիրի մարզի Առատաշեն գյուղում նախկին ամուսինը բենզին էր լցրել ու հրկիզել նախկին կնոջն ու նրա ամուսնուն, հրդեհել նրանց վագոն-տնակը: Ստացած վնասվածքների ու այրվածքների հետևանքով կինը` Օֆելյա Մովսիսյանը հիվանդանոցում մահացել էր:

Արմավիրի մարզի ընդհանուր իրավասության դատարանում օրերս ավարտված այս քրեական գործով դատավարությունը որոշ չափով լույս սփռեց այս հրեշավոր արարքի դրդապատճառների ու նախկին ամուսինների թշնամական հարաբերությունների վրա:

Լևոն Համբարձումյանն ու Օֆելյա Մովսիսյանն ամուսնացել էին 1978 թվականին, ունեցել 2 երեխա, իսկ 1991 թվականին` ամուսնալուծվել ու այլևս որևէ հարաբերություն չեն ունեցել միմյանց հետ: Հայրը երբևէ չի հանդիպել նաև իր երեխաների հետ:

Այդ ընթացքում կինն ամուսնացել է Ռուդոլֆ Բաբայանի հետ: Նախկին ամուսինը ևս նոր ընտանիք է կազմել ու կնոջ հետ բնակվել Երևանի Շենգավիթ համայնքում գտնվող իրենց բնակարանում: Բնակարանը, որ ժամանակին պատկանել է Համբարձումյանի ծնողներին, սեփականաշնորհված չի եղել և հանդիսացել է համայնքի սեփականությունը:

2005 թվականին, սակայն, բնակարանը Շենգավիթ համայնքի կողմից նվիրաբերվել է Համբարձումյանի նախկին կնոջը` Օֆելյա Մովսիսյանին, նրան տրվել է սեփականության իրավունքի վկայական։ Իր հերթին նախկին ամուսինը դիմել է դատարան և վերականգնել բնակարանի 1/2 մասով իր սեփականության իրավունքը։ Այս անգամ արդեն դատարան է դմել նախկին կինը ու բնակարանն ամբողջությամբ, դատարանի վճռով, ճանաչվել է նրա սեփականությունը։

Դրանից հետո կինը նոր հայց է ներկայացրել դատարան` Լ.Համբարձումյանին բնակարանից վտարելու պահանջով, որը սակայն կարճվել է և Լ.Համբարձումյանը շարունակել է բնակվել նշված հասցեում։ Իսկ 2008 թվականին կինը նոր խորամանկության է դիմել. նա բնակարանը, առք ու վաճառքի պայմանագրի հիման վրա, իբր, վաճառել է իր ներկայիս ամուսնուն` Ռ.Բաբայանին: Եվ Ռ.Բաբայանն արդեն ինքն է դիմել դատարան` Լ.Համբարձումյանին այնտեղից վտարելու պահանջով:

Ի վերջո, դատական անվերջանալի քաշքշուկներից, պետական ու դատական ատյանների իրարամերժ բազմաթիվ որոշումներից հետո Լ.Համբարձումյանը դատարանի վերջնական վճռով վտարվել է իր հայրական տնից: Այս ամենի արդյունքում նախկին ամուսինների միջև թշնամանք է ձևավորվել: Լևոն Համբարձումյանը բազմիցս սպառնացել է վրեժ լուծել, անգամ սպանել նախկին կնոջն ու նրա ամուսնուն: Նրանք էլ, վախենալով, որ Համբարձումյանն ի կատար կածի իր սպառնալիքները, թույլ են տվել նրան բնակվել վեճի առարկա բնակարանում, իսկ իրենք բնակվել են Արմավիրի մարզի Առատաշեն գյուղում գտնվող, Ռ.Բաբայանին պատկանող վագոն-տնակում։

2014թ. հունվարի 19-ին Լևոն Համբարձումյանը գնել է 3 լիտր բենզին, լցրել 6 առանձին շշերի մեջ և հաջորդ օրը գիշերը՝ ժամը 05:30-ից 06:00-ի սահմաններում, գնացել նախկին կնոջ ու նրա ամուսնու վագոն-տնակի մոտ, բենզին լցրել նրանց պատուհանների վրա և լուցկիով հրկիզել:

Բռնկված կրակից Օֆելյա Մովսիսյանն արթնացել ու բացել է դուռը, բայց նախկին ամուսինը դռան մոտ բենզին է լցրել նրա վրա ու այրել: Իսկ երբ Ռ.Բաբայանն օգնության է հասել կնոջը, Համբարձումյանը բենզին է լցրել նաև նրա վրա ու այրել նաև նրան: Վագոն-տնակում գտնվող Օ.Մովսիսյանի դուստրը օգնություն է ցույց տվել հրդեհից տուժած մորն ու նրա ամուսնուն և զանգահարել շտապ օգնություն:

Սակայն ստացած ծանր մարմնական վնասվածքներից 2 օր անց Օֆելյա Մովսիսյանը հիվանդանոցում մահացել է:

Իսկ նախկին կնոջն այրած տղամարդն արդեն դատարանի դահլիճում հայտարարել է, թե վրեժխնդիր է եղել, որովհետև նախկին կինն «իր հրեշությամբ իրեն հրեշ է դարձրել», զրկել արժանապատվությունից, իրավունքներից, բնակարանից, երեխաներից, թոռներից:

Իսկ առաջադրված մեղադրանքներում Լևոն Համբարձումյանն իրեն մեղավոր է ճանաչել մասնակիորեն` հայտնելով, որ դեպքի վայրից հեռանալով՝ ինքը զանգահարել է ոստիկանություն, հայտնել կատարածի մասին, ասել է իր գտնվելու վայրը:

Արմավիրի մարզի ընդհանուր իրավասության դատարանը Ռ.Համբարձումյանին դատապարտել է 15 տարվա ազատազրկման։