Փաստ ինֆո

Այսօր Շանթ Հարությունյանի պաշտպան Ինեսսա Պետրոսյանը միջնորդեց վերսկսել դատաքննությունը: Պաշտպանը նշեց, որ դատաքննության ավարտից հետո ձեռք է բերվել տեսանյութ, որը, ամբաստանյալների շահերից ելնելով, անհրաժեշտ է զննության ենթարկել:

Այն, ըստ փաստաբանի, ապացուցում է ամբաստանյալների անմեղությունը ու նրանց իրավունքների խախտումները:

Դատարանը միջնորդությունը մերժեց, քանի որ, որ ըստ դատարանի, միջնորդությունում հստակ չի նշվում, թե կոնկրետ որ հանգամանքների շուրջ է տեսանյութը:

Ինչպես ավելի ուշ պարզվեց, խոսքն ԱՄՆ Կոլումբիայի համալսարանում ՀՀ նախագահի ելույթի տեսանյութի մասին է: Դրանում, ըստ պաշտպանի, երկրի ղեկավարն ամբաստանյալներին որակել է որպես հանցագործներ:  Փաստաբանը նշեց, որ միգուցե նա տիրապետում է տեղեկությունների, որոնք քննության ենթակա՞ են: Ուստի՝ պաշտպանը միջնորդեց դատարան հրավիրել ՀՀ նախագահին ու հարցաքննել՝ որպես վկա:

Դատարանն այս միջնորդությունը ևս մերժեց՝ փաստելով, որ պաշտոնատար անձանց կարծիքները դատարանի համար հիմք չեն՝ դատաքննությունը վերսկսելու ու որպես վկա նրանց հարցաքննելու համար: Ինեսսա Պետրոսյանն իր հերթին հույս հայտնեց, որ դատարանը «մինչև վերջ կմնա այդ մտքին»:

Ինեսսա Պետրոսյանը դատարանին փոխանցեց 10 հազար քաղաքացիների ստորագրություններով փաստաթուղթ, որում քաղաքացիները պահանջում են ամբաստանյալների նկատմամբ քրեական հետապնդումը դադարեցնել և «ազատ արձակել քաղբանտարկյալներին»:  

Այսօրվա դատական նիստում ամբաստանյալներ Վահե Մկրտչյանը, Ալբերտ Մարգարյանն ու Միսակ Առաքելյանը հանդես եկան պաշտպանական ճառերով:

Վահե Մկրտչյանը, մասնավորապես, նշեց, որ իրենք այլ արժեքներ են կրում և որպես այդպիսին՝ այլ ճանապարհ, քան դուրս գալ ու պայքարել կոռումպացված իշխանությունների դեմ, չէին տեսնում: Իշխանությունները, այդ թվում՝ մեղադրողը, Մոսկվայի հրամաններն են կատարում, դատավճիռ կայացնելուց հետո պարզ կլինի՝ դատարանը պատվեր կատարո՞ղ է, թե՝ ոչ:

«Դուրս ենք եկել առաջին հերթին արժեքներ ու դրանց մասին գաղափարներ տարածելու»,- ասաց նա:  

Ամբաստանյալ Ալբերտ Մարգարյանը հայտարարեց, որ իրենց դատում են՝ Հայրենիքը սիրելու համար: Նա դժգոհություն հայտնեց Հայաստանի՝ Եվրասիական տնտեսական միությանը միանալու կապակցությամբ: Ըստ նրա՝ Հայաստանում տիրող իրավիճակը շատ նման է հարյուր տարի առաջվա իրադրությանը. վերաձևակերպելով «Սարոյան եղբայրներ» ֆիլմի արտահայտությունը՝ ամբաստանյալը հայտարարեց. «Բա Ղարաբաղն ի՞նչ եղավ,- ու հավելեց,- քանի դեռ կան մեր նման, Հայկ Կյուրեղյանի նման խենթերը, մենք դա թույլ չենք տա»:

Ամբաստանյալ Միսակ Առաքելյանը նկատեց, որ 15 հոգով հեղափոխություն, անգամ հեղաշրջում անել հնարավոր չէ, պարզապես իրենք իրենց գործողություններով «խփում են» Ռուսաստանին: Չընդունելով իրենց առաջադրված խուլիգանության մեղադրանքը՝ ամբաստանյալը հայտարարեց. «Ցույց տվեք մի իշխանավորի, ով ժողովրդի հետ ավելի վայելուչ է վերաբերվել, քան մենք: … Վաղվա օրը մեզանով է գալու»:

Ռեպլիկով հանդես եկած մեղադրող Գևորգ Գևորգյանը պնդեց մեղադրանքը, նշեց, որ այն լիովին ապացուցված է: «Կատարվածը հեղափոխություն չէ, ընդամենը խուլիգանություն է»,- ասաց նա:  

Ամբաստանյալների վերջին խոսքերը լի էին քաղաքական գնահատականներով: Պահեստազորի գնդապետ, ամբաստանյալ Վարդան Վարդանյանը հայտարարեց, որ գնացել է Հայրենիքը պաշտպանելու, ինչպես վարվել է ողջ կյանքում: «Սա մեր երազած Հայրենիքը չէ, որ այսպես հեշտությանբ ծախվի Ադրբեջանի ռազմավարական դաշնակից Ռուսաստանին»:

Նա մեղավոր ճանաչեց Ռուսաստանի կայսրությանը՝ հայերին ռուս- թուրքական պատերազմների մեջ ներքաշելու մեջ, ռուսական շահն էր, որ  ժամանակին հանգեցրեց ցեղասպանությանը: Այսօր էլ ՌԴ-ն, հեշտացնելով Հայաստանից քաղաքացիների Ռուսաստան  տեղափոխվելն ու ինտեգրումը Ռուսաստանում, նպաստում է հայաթափմանը:

Ամբաստանյալը «մեղադրեց» իր պապին ու մորը՝ իր աշխարհայացքի ձևավորման հարցում և հիշելով խուլիգանության մեղադրանքը՝ ցանկություն հայտնեց, որ Վոյնիչի «Բոռը» դառնա բոլոր խուլիգանների սեղանի գիրքը:

«Մի վախեցեք հեղափոխություններից,- շարունակեց ամբաստանյալ Ալեք Պողոսյանը,- աշխարհում չկա մի հզոր պետություն, որտեղ հեղափոխություն տեղի ունեցած չլինի»:

Ամբաստանյալ Սևակ Մնացականյանը հայտարարեց, որ  խուլիգանական դրդումներ չեն եղել, չէին էլ կարող լինել: Դիմելով հանրությանը՝ նա ընդգծեց. «Քանի դեռ ձեզ չեք հարգում, ձեր հետ հաշվի չեն նստելու»: Արձանագրելով, որ Հայաստանում համատարած թշվառություն է, մեծ թվով քաղաքացիներ դիմում են արտագաղթի, վտանգված է Հայոց անվտանգությունը, նա նշեց.   «Ավելի հեշտ կլինի ցատկով լուսին հասնել, քան՝ արդարություն գտնել»: