Փաստ ինֆո

«Հին Էրիվան» ռեստորանային  համալիրի սեփականատեր Մանվել  Տեր-Առաքելյանը բողոքներ է  ներկայացրել Վճռաբեկ  դատարան՝   իր երկու բողոքների  գործերով առաջին ատյանի ու Վերաքննիչ դատարանի  որոշումների դեմ, որոնցով իր բողոքները մերժվել էին:

Երկու բողոքներն էլ ներկայացվել են  «Յունիբանկի»  վարչության նախագահ Վարդան Աթայանի նկատմամբ քրեական գործի հարուցումը մերժելու  վարույթ իրականացնող մարմնի որոշման  ու  դրա դեմ գործարարի բողոքը մերժելու դատախազի  որոշման դեմ:

Բողոքներից մեկով Մանվել Տեր-Առաքելյանը դատական կարգով վիճարկում է  բանկի վարչության նախագահի դեմ ՀՀ քրեական  օրենսգրքի   178-րդ, 185-րդ և 214-րդ  հոդվածներով՝ խարդախություն, գույքը դիտավորությամբ ոչնչացնելը կամ վնասելը, առևտրային կազմակերպության կողմից   լիազորությունները չարաշահելը,  իսկ մյուսով՝   ՀՀ քրեական օրենսգրքի 333-րդ հոդվածով՝  սուտ   մատնություն, քրեական գործի հարուցումը մերժելու որոշումները: 

Բողոքներից մեկի համար հիմք է ծառայել քրեական գործ հարուցելը մերժելու և քրեական հետապնդում չիրականացնելու մասին հետաքննիչ  Ա. Հարթենյանի որոշումը  և   բողոքը մերժելու մասին Երևանի  դատախազ Ա. Դավթյանի որոշումները:

Հետաքննիչը  գտել էր, որ «Յունիբանկ»   ՓԲԸ-ն վարչության նախագահ   Վարդան Աթայանի գործողություններում բացակայում է ՀՀ քրեական  օրենսգրքի   178-րդ, 185-րդ և 214-րդ հոդվածներով նախատեսված հանցակազմի հատկանիշները:

Իսկ Երևան ի դատախազ   Ա.  Դավթյանի կողմից  կայացված բողոքը մերժելու մասին որոշման համաձայն,  «նյութերի ուսումնասիրությամբ պարզվել է, որ նյութերի նախապատրաստման ընթացքում որևէ փաստական տվյալ ձեռք չի բերվել «Յունիբանկ» ՓԲԸ-ի վարչության նախագահ Վարդան Աթայանի կողմից նախնական դիտավորությամբ, լիազորությունները արաշահելով, Մանվել Տեր-Առաքելյանի գույքը հափշտակելու, ինչպես նաև վերջինիս գույքը դիտավորյալ վնասելու վերաբերյալ, ուստի Վարդան Աթայանի գործողություններում բացակայում է ՀՀ քրեական  օրենսգրքի   178-րդ, 185-րդ  և 214-րդ  հոդվածներով նախատեսված հանցակազմերը, իսկ «Հին Էրիվան Հոլդինգ» ՍՊԸ-ի   և  «Յունիբանկ» ՓԲԸ-ի միջև առկա է պայմանագրային, քաղաքացիաիրավական վեճ, որի վերաբերյալ կայացվել է դատական ակտ»:

Վճռաբեկ բողոք է ներկայացվել նաև  «Յունիբանկի» վարչության նախագահ Վ.Աթայանի նկատմամբ  սուտ մատնության հոդվածով քրեական գործ չհարուցելու որոշման համար վարույթն իրականացնող մարմնի դեմ «Հին Էրիվանի» սեփականատեր Մանվել Տեր-Առաքելյանի բողոքի գործով:

 Բողոքի համար հիմք էին ծառայել հետևյալ հանգամանքները. 2009թ. մայիսի 25-ին «Յունիբանկի» և «Հին Էրիվանի» սեփականատիրոջ միջև կնքվել էր պայմանագիր՝ վճարումների հետաձգման մասին:

Մանվել Տեր-Առաքելյանը զարմանքով հայտնաբերել է, որ վարկի գումարների վճարումը հետաձգվել է ոչ թե մինչև 2019թ., ինչի մասին կողմերը բանավոր պայմանավորվել էին, այլ՝ մինչև 2017թ.:

Մ.Տեր-Առաքելյանն այս մասին հայտնել է Աթայանին, վերջինս հավաստիացրել է, որ թյուրիմացություն է տեղի ունեցել, կշտկվի: Եվ, իրոք, երկրորդ տարբերակում տեխնիկական սխալն ուղղված է եղել: 

Այդուհանդերձ, 2011թ. հուլիսի 13-ին Վարդան Աթայանը դիմել է ՀՀ ոստիկանության կազմակերպված հանցավորության դեմ պայքարի վարչություն՝ հայտարարելով, որ շտկված պայմանագրում ստորագրություններն ու կնիքը կեղծված են՝ իբրև Մ.Տեր-Առաքելյանի կողմից ֆինանսական շահույթ ստանալու նպատակով:

Փորձաքննության եզրակացությամբ, սակայն, հերքվել է այս պնդումը, այսինքն՝ որևէ կեղծիք չի հայտնաբերվել:

Մանվել Տեր-Առաքելյանը պահանջել էր քրեական գործ հարուցել Աթայանի նկատմամբ՝ զրպարտության համար, սակայն քննիչը գտել էր, որ Աթայանի դեմ քրեական գործ հարուցելու համար հիմքեր չկան:

Դատախազը  մերժել էր քննիչի որոշման դեմ ներկայացված բողոքը, իսկ դատական ատյանները՝ քննիչի ու դատախազի որոշումները վերացնելու պահանջի մասին Տեր-Առաքելյանի հայցը: