Փաստ ինֆո

Այսօր դատարանում ներկայացվեցին Սյունիքի մարզպետ Սուրիկ Խաչատրյանի առանձնատան մոտ զինված միջադեպի ժամանակ սպանված Ավետիք Բուդաղյանի իրավահաջորդ Էմիլ Բուդաղյանի ու վերջինիս ներկայացուցիչ Հայկ Ալումյանի բողոքները:

Դիմողները պահանջում են վերացնել մահվան հիմքով Ավետիք Բուդաղյանի նկատմամբ քրեական հետապնդում չիրականացնելու մասին և դրա հիման վրա մարզպետի որդու՝ Տիգրան Խաչատրյանի ու Զարզանդ Նիկողոսյանի նկատմամբ քրեական հետապնդումը դադարեցնելու՝  քննիչի ու դրանց դեմ կողմի բողոքը մերժելու մասին զինվորական դատախազի որոշումները:

Ըստ Հայկ Ալումյանի՝ այդ որոշումներն ակնհայտ անհիմն են ու անօրինական և ընդունվել են՝ առանձնապես ծանր հանցագործությունը պարտակելու դիտավորությամբ:

Հայկ Ալումյանը նշեց, որ դեպքի ժամանակ 4 հրազենային վնասվածք ստացած ու դրա հետևանքով մահացած Ավետիք Բուդաղյանի մասով նախաքննական մարմինը գտել է, որ նա ենթակա է քրեական պատասխանատվության՝ սպանության փորձ կատարելու ու ծանր մարմնական վնասվածք  հասցնելու համար, սակայն որոշել է քրեական հետապնդում չիրականացնել՝ Ավետիք Բուդաղյանի մահվան հիմքով:

Նախաքննական մարմինն այս որոշումը կայացնելիս հիմնվել է ՀՀ քրեական դատավարության օրենսգրքի 35-րդ հոդվածի 1-ին մասի 10-րդ կետի վրա, ըստ որի՝ քրեական գործի վարույթը կարճելու կամ քրեական հետապնդումը դադարեցնելու բացառող հանգամանք է անձի մահը:

Դիմող կողմը, հիմնվելով նույն այդ կետի շարունակության վրա, այն է՝ «բացառությամբ այն դեպքերի, երբ գործի վարույթն անհրաժեշտ է  մահացածի իրավունքները վերականգնելու համար», գտնում է, որ Ավետիք Բուդաղյանի նկատմամբ խախտվել է անմեղության կանխավարկածի սկզբունքը:

Դիմող կողմը գտնում է, որ խախտվել է նաև Մարդու իրավունքների եվրոպական կոնվենցիայի 6-րդ հոդվածով երաշխավորված թեկուզ մահացած մարդու արդար դատաքննության իրավունքը. քննչական մարմինը չէ, որ պետք է անձին մեղավոր կամ անմեղ ճանաչեր: Ուստի՝ դիմող կողմը պահանջում է, որպեսզի  նախաքննական մարմնի՝ քրեական հետապնդում չիրականացնելու որոշումը վերացվի ու այն քննվի դատարանում ու հաստատվի Ավետիք Բուդաղյանի անմեղությունը:      

Կողմը գտնում է, որ անտրամաբանական է նախաքննական մարմնի եզրահանգումը, որ Սուրիկ Խաչատրյանի մեքենայում Ավետիք Բուդաղյանին ծեծի է ենթարկել միայն Զարզանդ Նիկողոսյանը, ընդ որում՝ նախաքննական մարմինն աներկբա ընդունել է դա՝ հիմնվելով հենց Զ.Նիկողոսյանի ցուցմունքի վրա առ այն, որ ծեծի ընթացքում Սուրիկ Խաչատրյանն անխռով ննջելիս է եղել:

Հայկ Ալումյանը անհամոզիչ է համարում այս փաստարկը՝ ենթակա անձ հանդիսացող Զարզանդ Նիկողոսյանը չէր համարձակվի առանց Սուրիկ Խաչատրյանի հրահանգի վիճաբանել, առավել ևս՝ հարվածել Սուրիկ Խաչատրյանի կողմից իր մեքենան նստելու համար հրավիրված անձին՝ Ավետիք Բուդաղյանին:

Այդ դեպքում հետևելով նույն նախաքննական մարմնի տրամաբանությանը՝ Ավետիք Բուդաղյանը վրեժխնդիր լինելու ցանկություն կունենար ոչ թե Սուրիկ Խաչատրյանի, այլ՝ իրեն ծեծող Զարզանդ Նիկողոսյանի հանդեպ:

Հայկ Ալումյանը նշեց նաև, որ նախաքննական մարմինը չի պարզել, թե երբ ու ում կողմից են պատճառվել Ավետիք Բուդաղյանին պատճառված  4 և Արտակ Բուդաղյանի մեկ հրազենային վնասվածքները:

Տեսագրությունից պարզ երևում է, ըստ Հայկ Ալումյանի, որ Ավետիք Բուդաղյանի միակ գործողությունը եղել է դեպքի վայրից հեռացնել  եղբորը՝ Արտակ Բուդաղյանին, մինչև այն պահը, երբ հակառակ կողմի կրակոցներից ծանր մարմնական վնասվածք է ստացել Արտակ Բուդաղյանը:

Միայն դրանից հետո Ավետիք Բուդաղյանը երկու անգամ կրակել է: Այս մաին է վկայում այն փաստը, որ դեպքի վայրից հայտնաբերվել է 15 պարկուճ, որոնցից միայն երկուսն է կրակվել Ավետիք Բուդաղյանի կողմից: Ըստ նախաքննական մարմնի` Ավետիք Բուդաղյանի վրա վերջին կրակոցի ձայնը ուժգին է եղել, որովհետև միաժամանակ երկու հոգի՝ Զարզանդ Նիկողոսյանն ու Տիգրան Խաչատրյանն են կրակել, ընդ որում` արդեն մահամերձ, գետնին ընկած Ավետիք Բուդաղյանի վրա:

Այս ամենով հանդերձ՝ նախաքննական մարմինը հանգել է սխալ եզրահանգման, որ Ավետիք Բուդաղյանը հարձակվողն է եղել և տակտիկական խորամանկ հնարք կիրառելով` հաջորդ երկու որոշումներում հանգել, որ պաշտպանվողներն էլ եղել են Տիգրան Խաչատրյանը և Զարզանդ Նիկողոսյանը, ովքեր գործել են անհրաժեշտ պաշտպանության սահմաններում, ու այդ հիմքով դադարեցրել նրանց քրեական հետապնդումը:    

Հաջորդ դատական նիստում իրենց առարկություններով հանդես կգան քննիչն ու դատախազը, ապա դիմող կողմը, դրանց հիման վրա, կներկայացնի իր ամփոփիչ դիտարկումները: