Փաստ ինֆո

Շանթ Հարությունյանի և մյուսների գործով հաջորդ դատական նիստում պաշտպանական ճառերով հանդես կգան  ամբաստանյալներ Վահե Մկրտչյանը, Միսակ Առաքելյանն ու Ալբերտ Մարգարյանը:

Նրանք այսօրվա դատական նիստում հայտարարեցին, որ պատրաստ չեն  ներկայացնել իրենց  պաշտպանական ճառերը, ժամանակ խնդրեցին դատարանից ճառերը պատրաստելու համար:

Երկու օր անց տեղի ունենալիք դատական նիստում ամբաստանյալների պաշտպանական ճառերի հրապարակումից հետո  կողմերը կօգտվեն ռեպլիկի իրենց իրավունքից, ապա վերջին խոսքով հանդես կգան ամբաստանյալները և դատարանը կհեռանա խորհրդակցական սենյակ՝ դատավճիռ կայացնելու:

Իսկ այսօրվա դատական նիստում պաշտպանական ճառերով հանդես եկան գործով մյուս ամբաստանյալները, այդ թվում՝ Շանթ Հարությունյանն ու նրա անչափահաս որդին՝ Շահեն Հարությունյանը:

Ամբաստանյալների պաշտպանական ճառերը   քաղաքա կան ուղղվածություն ունեին: Ամբաստանյալ Ալեք Պողոսյանը անդրադարձ կատարեց պատմությանը,  և, մասնավորապես, ռուս-թուրքական պայմանագրերին, Շանթ Հարությունյանը գաղափարակցի  ճառում «պատմական սխալներ» գտավ:

Ամբաստանյալ Արմեն Հովհաննիսյանը, ով Երկրապահ կամավորական միության անդամ է, 20 տարի ծառայել է բանակում, մայորի զինվորական կոչում ունի, մեղադրողի կողմից անչափահաս Շահեն Հարությունյանին 5 տարվա ազատազրկման դատապարտելու մասին միջնորդությունը որակեց որպես անբարոյական: Նա պարզաբանեց, որ անչափահասն ընդամենը փորձել է պաշտպանել հորը՝ Շանթ Հարությունյանին, ոստիկանների բռնությունից:

Ճառերում դժգոհություններ հայտնվեցին նաև Հայաստանի՝ Մաքսային միությանը միանալու կապակցությամբ, ինչի հետևանքով  Հայաստանի կդառնա Ռուսաստանի ծայրամաս, կկորցնի իր անկախությունը ու կկործանի պետականությունը: Ամբաստանյալներն հայտարարեցին, որ իրենք հեղափոխական քաղբանտարկյալներ են և դատվում են՝ հայրենասիրության ու արժանապատվություն ունենալու համար:

«Հայաստանում կա մեկ ընդդիմություն, և այդ ընդդիմությունն այս դահլիճում է»,- հայտարարեց Արմեն Հովհաննիսյանը: Նա հայտարարեց նաև, որ եթե իր ընտանիքի անդամներից որևէ մեկի հետ ինչ-որ բան պատահի, ապա ինքը վստահ կլինի, որ դա իշխանության վրեժխնդրության արդյունքն է:

Ամբաստանյալ Հայկ Հարությունյանը նշեց, որ իրենց միակ մեղքն այն է եղել, որ բողոքել են անտարբերության դեմ, իսկ Երևանի կենտրոնում տեղի ունեցած դեպքերը նա որակեց որպես «ոստիկանական գերազանց կազմայերպած պրովոկացիա»: Ընդգծելով, որ ինքը երբեք գետին ընկած մարդուն չէր հարվածի՝ ամբաստանյալը հայտարարեց, որ իրեն դատում են ազատամտության ու հայրենանվիրության համար:  

Ամբաստանյալը հայ ժողովրդից ներողություն խնդրեց, որ միայն մեկ տարի առաջ են սկսել պայքարել՝ «թալանչի իշխանավորներից ստրկական գերության համարժեք վիճակում գտնվող ժողովրդին ազատելու» համար:

Պահեստազորի գնդապետ Վարդան Վարդանյանը նշեց, որ Մաքսային միությանը միանալուց հետո «ինձ ուղարկելու են Ռուսաստան նստելու՝ ինձ մաքսազերծելու են, նո՞ր ուղարկեն»: Նա դժգոհություն հայտնեց ռուս պաշտոնյայի հայտարարության կապակցությամբ, թե «Ադրբեջանը մեր ռազմավարական դաշնաիկիցն է»: Նա խորհուրդ տվեց ռուսներին կողմնորոշվել՝ ով է, ի վերջո, Ռուսաստանի ռազմավարական դաշնակիցը՝ Ադրբեջա՞նը, թե՞ Հայաստանը:

«Մեր երկրում արդարություն չկա, ուստի չկա նաև արդարադատություն, մեր մոտ արդարադատություն գոյություն ունի միայն արդարներին դատելու համար»,- ասաց ամբաստանյալը՝ հավելելով՝ «Սուրիկ Խաչատրյանը չեմ, որ մի հատ էլ պաշտոն տա»:

Այսօրվա դատական նիստում պաշտպաններից վերջինը պաշտպանական ճառը հրապարակեց ամբաստանյալ Ալեք Պողոսյանի պաշտպան Էդուարդ Աղաջանյանը: Նա միջնորդեց դադարեցնել իր պաշտպանյալի նկատմամբ քրեական հետապնդումը ու կայացնել արդարացման դատավճիռ:

Մեղադրանքը «աչքաչափով է գրվել»՝ չհիմնավորված ու չստուգված տվյալների ու ենթադրությունների հիման վրա: Մեղադրանքն առաջադրվել է՝ հիմք ընդունելով ոստիկան տուժողների ցուցմունքները այն դեպքում, որ ամբաստանյալների ցուցմունքներն անարժանահավատ են որակվել: Ըստ պաշտպանի՝ գործը քաղաքական հաշվեհարդարի, հանցավորության դեմ պայքարի պատրանք ստեղծելու նպատակ ունի: