Փաստ ինֆո

«Փաստինֆո»-ին որոշ մանրամասներ են հայտնի դարձել Վարդենիսում 2 օր առաջ կատարված սպանությունից, որոնք հիմք են տալիս ենթադրելու, որ կատարվածը վարդենիսյան ոսկու տենդի հետևանք է:

Պարզվում է` Գրիշա  Մանուկյանը և իր ազգական Մյասնիկ Մանուկյանի որդիները 2-3 տարի զբաղվել են Վարդենիսի տարածաշրջանում գտնվող Սոթքի ոսկու հանքից հանքանյութի գողությամբ: Այս «բիզնեսը», սակայն, նրանց ոչ թե մտերմացրել, այլ հակառակը` թշնամացրել է:

Հատկապես, որ Սասուն Կարապետյանն ու Սարգիս Գալստյանը պաշտպանել են Մյասնիկ Մանուկյանի որդիների շահերը, ինչից էլ թշնամություն է առաջացել նաև նրանց ու Գրիշա Մանուկյանի և իր եղբայր Արման Մանուկյանի միջև:

2014 թվականի հոկտեմբերի 12-ին` ժամը 17:00-ի սահմաններում, Գրիշա Մանուկյանն իր եղբոր` Արման Մանուկյանի և ընկերների հետ պատահաբար հանդիպել են Սարգիս Գալստյանին, նրա հետ փորձել պարզել իրենց հարաբերությունները:

Բայց վերջինը արհամարական վերաբերմունք է ցույց տվել ու հայհոյել Գրիշա Մանուկյանին, որի պատճառով Արման Մանուկյանը ձեռքով հարվածել է նրա դեմքին:

Այս դեպքից հետո նա իր իր ավտոմեքենայով դիմել է փախուստի: Բայց որոշ ժամանակ անց, Գրիշա Մանուկյանը դարձյալ հանդիպել է նրանց ու դարձյալ փորձել են պարզել իրենց հարաբերությունները, սակայն խոսակցությունը վերաճել է փոխադարձ հայհոյանքի:

Գրիշա Մանուկյանը, վերցնելով փայտե մահակը մոտեցել է Սասուն Կարապետյանի վարած ավտոմեքենային, ձեռքով հարվածել նրան, իսկ փայտով` ավտոմեքենային: Սասուն Կարապետյանը դիմել է փախուստի, իսկ Գրիշա Մանուկյանը, տեսելով Սարգիս Գալստյանի ավտոմեքենան, փորձել է մոտենալ Սարգիս Գալստյանի ավտոմեքենային: Բայց Գալստյանի մեքենայից իջել է Սասուն Կարապետյանը և ինքնաձիգից կրակել Գրիշայի եղբոր` Արման Մանուկյանի վրա ու դիմել են փախուստի:
 
Հիշեցնենք՝ ՀՀ քննչական կոմիտեի Գեղարքունիքի մարզային քննչական վարչության Վարդենիսի քննչական բաժնում դեպքի առթիվ հարուցվել է քրեական գործ` ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով:

Սպանությունից ժամեր անց՝ նույն օրը երեկոյան, Սասուն Կարապետյանը կամովին ներկայացել է ոստիկանություն և ձերբակալվել: