Փաստ ինֆո

Արկադի Վարդանյանը շարունակում է մնալ բժիշկների հսկողության տակ և ստանալ դեղորայքային բուժում: Այս մասին «Փաստինֆո»-ին հայտնեց Արդարադատության նախարարության ՔԿ վարչության մամուլի պատասխանատու Գոռ Ղլեչյանը:

Հիշեցնենք` արդեն շուրջ մեկ տարի պատիժը կրող Արկադի Վարդանյանը սեպտեմբերի 19-ին առողջական վիճակի վատացման արդյունքում տեղափոխվել էր  «Դատապարտյալների հիվանդանոց», որտեղ համապատասխան բուժում ստանալուց հետո  հոկտեմբերի 8-ին տեղափոխվել էր «Վանաձոր» ՔԿՀ:

Հիշեցնենք նաև, որ Արկադի Վարդանյանը 2013թ դատարանի կայացրած որոշմամբ դատապարտվել էր 10 տարվա ազատազրկման:

Դատարանի դատավճռով՝ Արկադի Վարդանյանը շահադիտական դրդումներով օժանդակել է իր ընկերոջ` Արսեն Ավետյանի հոր սպանության նախապատրաստությանը:

Ըստ գործի նյութերի՝ Արսեն Ավետյանը որոշել է սպանել հորը, երբ պարզել է, որ նա իրեն ու իր որդուն հանել է առանձնատան հաշվառումից: 

Արկադի Վարդանյանն առաջարկել է կամրջից ցած կամ գետը նետելու տարբերակը, սակայն ընտրությունը, ըստ մեղադրական եզրակացության, կանգ է առել հոգեմետ նյութերի մեծ չափաբաժնով ծնողին թունավորելու առաջարկի վրա:

Արկադի Վարդանյանի առողջական վիճակի մասին տեղեկություններ պաշտպանական կողմը հրապարակել էր դեռ դատավարական փուլում` հայտնելով, որ նրա մոտ առկա է բարորակ ուռուցք, որը կարող է առաջացնել օնկոլոգիական բարդություններ: Արկադի Վարդանյանը նաև հայտնել էր, որ ունեցել է ստամոքսից արյունահոսություններ: