Փաստ ինֆո

ԼՂՀ պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանի գործով այսօրվա դատական նիստում պատվաստումային խմբի ղեկավար, վկա Հասմիկ Թունյանը հայտարարեց, որ նորակոչիկին միևնույն ժամանակ 8 պատվաստում է կատարվել, ինչպես որ մյուս նորակոչիկներին, սակայն թե ի՞նչ ղեղորայք և ո՞ր երկրի արտադրության է եղել, վկան դժվարացավ պատասխանել:

Վկան նաև դժվարացավ պատասխանել, թե նորակոչիկներին ներարկվող պատվաստանյութերը գրանցվա՞ծ են Հայաստանի Հանրապետությունում, թե՝ ոչ: «Ինձ թվում է՝ գրանցված կլինեն»,- ասաց վկան:

Դեղորայքի պիտանելիության և որակի մասին էլ վկան նշեց, որ ինքը պատասխանատու չէ դեղերի որակի համար, «դրանք հատուկ ռեժիմով պահվում են սառնարաններում և զինակոչիկների համար, չէին կարող վատը լինել»:

Պարզ դարձավ նաև, որ ամբաստանյալ բժիշկ Կարեն Ջուլհակյանը ներարկման օրը երեկոյան ժամին նորակոչիկի ջերմելու մասին տեղեկացրել է նաև վկային ու հավելել, որ «Պարացետամոլ» է տվել, որի ընդունումից հետո տղայի ջերմությունը 38.3-ից իջել է 37.3-ի, և որ տղան դեռևս կմնա իր հսկողության տակ:

Վկայի խոսքով՝ ցանկացած պարագայում զինակոչիկները պատվաստումից հետո յուրաքանչյուրն անհատապես 20 րոպե տևողությամբ գտնվում է հսկողության ներքո:

Այս հայտարարությունը զայրացրեց տուժողի իրավահաջորդին՝ մահացած նորակոչիկի հորը՝ Նորայր Սահակյանին. «Ինչպե՞ս կարող եք մոտ 300 նորակոչիկի վերահսկել՝ յուրաքանչյուրին հատկացնելով այդքան ժամանակ, դրա համար էլ մարդկանց գլուխ եք ուտում»:

Վկան նաև պարզաբանեց, որ պատվաստումից հետո ջերմության բարձրացումը նորմալ ռեակցիա է, և 80 տոկոսի մոտ ջերմություն  է լինում, ալերգիկ ֆոն, սակայն Նորայր Սահակյանի փաստաթղթերով ոչ մի հակացուցում չի եղել:

Նշենք նաև, որ այս տարվանից սկսած նորակոչիկները պատվաստվում են ոչ թե կենտրոնական հավաքատեղիում, ինչպես նախկինում էր, այլ՝ պոլիկլինիկաներում՝ 1 կամ 2 ամիս առաջ, ինչը հնարավություն կտա խուսափել հետագա բարդություններից:

Նշվածի վերաբերյալ վկան հայտնեց, որ դեռևս 2-3 տարի առաջ իրենք բարձրացրել են այս հարցը, իսկ այս դեպքը միանշանակ ազդեցություն ունեցավ այդ որոշման ընդունման վրա:

Վկան նաև հայտնեց, որ այդ օրը եղել են նաև այլ ջերմող նորակոչիկներ, սակայն ծանր դեպքեր չեն եղել, Նորայր Սահակյանի վիճակը ևս ծանր չի եղել, իսկ բժիշկ Կարեն Ջուլհակյանն իրավիճակը ճիշտ է գնահատել և գործել:

 «Դե իհարկե ճիշտ է: Ձեր երեխան չի, դրա համար էլ այդպես եք ասում»,- զայրացավ տուժողի իրավահաջորդը, ինչին ի պատասխան վկան նշեց, որ «բոլոր նորակոչիկները 2 տարի մեր երեխաներն են, հետո՝ Ձերը»:

Վկան նաև հայտնեց, որ, ըստ  Ջուլհակյանի, տղայի վիճակը թույլ է տվել նրան տեղափոխել զորամաս:

Հաջորդիվ վկայություն տալու հրավիրվեց փոխգնդապետ Սուրեն Աբրահամյանը, ով նորակոչիկին տեղափոխող ավտոբուսում է գտնվել: Նրա խոսքով՝ տղան ջերմել է և իրեն խնդրել ետ վերադառնալ հավաքատեղի, տղան նաև ճանապարհին փսխել է:

Երևան-Ստեփանակերտ ճանապարհին նորակոչիկներին տեղափոխող ավտոբուսը մի քանի անգամ կանգնել է, նորակոչիկները  ճաշել են, թեյել, հոգացել բնական կարիքները:

 Տուժողի իրավահաջորդի պնդմամբ՝ որդին ոչինչ չի կրել:

Կարեն Ջուլհակյանը, Վարուժան Մանասյանը, Մհեր Դավիդյանցը և Արկադի Չախոյանը մեղադրվում են այն բանի համար, որ 22.12.2012թ. անփույթ վերաբերմունք են  ցուցաբերել իրենց ծառայության նկատմամբ, որն էլ անզգուշությամբ առաջացրել է ծանր հետևանք: