Փաստ ինֆո

Դատական դեպարտամենտի նախկին ղեկավար Միսակ Մարտիրոսյանի ու մյուսների գործով այսօրվա նիստում վկա Արմեն Մանուկյանը հայտնեց, որ ռուսաց Նիկոլայ ցարի դիմերեսով ոսկե մետաղադրամն ու կոնյակն իր կինը նվիրել է Միսակ Մարտիրոսյանին՝ ծննդյան օրվա առթիվ: 

Նա հերքեց, որ նվերը «մաղարիչ» էր՝ աշխատանքի ընդունվելու դիմաց: «Կինս Մոսկվայի իրավաբանականն է ավարտել, ընդունում են՝ որպես արխիվապահ, ինքն էլ մաղարի՞չ է անում»:

Նախաքննության ցուցմունքում, սակայն, վկան հայտնել էր, որ մետաղադրամն ու կոնյակն իր կինն աշխատանքի ընդունվելու համար է տվել:

Ի դեպ, նրա հարցաքննության ժամանակ պարզվեց, որ ներկա է եղել իր կնոջ հարցաքննության մի մասին: Պարզվեց նաև, որ Արմեն Մանուկյանի հարցաքննությանն իր հերթին ներկա է անմիջականորեն այդ դրվագով վկա Աշոտ Գասպարյանը:

Դատարանի դահլիճից հեռացած, ապա նորից հրավիրված Աշոտ Գասպարյանը հայտնեց, որ ինքը նորմալ, ընկերական հարաբերություններ ունի Միսակ Մարտիրոյանի հետ, ճանաչում է գործով այլ ամբաստանյալների ևս, իսկ գործով ամբաստանյալ, Դատական կարգադրիչների ծառայության անձնակազմի կառավարման բաժնի պետ Նարեկ Գասպարյանն իր որդին է:

Դատարանը վկային նախազգուշացրեց, որ որդու գործոնը հաշվի առնելով՝ կարող է հրաժարվել ցուցմունք տալուց, սակայն վկան ցուցմունք տալու պատրաստակամություն հայտնեց: Նա նշեց, որ խնդրել է Միսակ Մարտիրոսյանին աշխատանքի ընդունել վերոհիշյալ վկա Արմեն Մանուկյանի կնոջը, խնդրանքը բավարարվել է:

Այն հարցին, թե աշխատանքի ընդունելու դիմաց որևէ ակնարկ եղե՞լ է, վկան պատասխանեց. «Մեծ բան չէ, ավարտած աղջիկ է, ընդունվել է՝ որպես արխիվապահ, մեր ընկերության մեջ ի՞նչ ակնարկ պետք է աներ՝ մի շիշ կոնյա՞կ ուղարկիր»: 
 
Այսօր հարցաքննված մյուս երկու վկաներն առնչվում էին բուն դատական կարգադրիչների գործին, մասնավորապես՝ Ավան և Նոր Նորք վարչական շրջանների դատարանի դատական կարգադրիչների ստորաբաժանման ղեկավար Բագրատ Արիկյանցի մեղադրանքին:

Կիմ Տերտերյանը հիշյալ ստորաբաժանումում աշխատանքի է ընդունվել ու մեկ-մեկուկես տարի մնացել է ձևակերպված՝ որպես կարգադրիչ, սակայն աշխատանքի չի գնացել:

Մյուս վկան՝ Ալբերտ Այնաջյանը, ևս 9 ամսից 1 տարի ձևակերպված է եղել՝ որպես դատական կարգադրիչ: Նախաքննության ընթացքում վկան հայտնել էր, որ իրեն զանգահարել է մի մարդ, ներկայացել որպես Բագրատ Արիկյանց, տվել իրեն բանկային քարտ, ասել, որ մի քանի օր գնա աշխատանքի, որպեսզի գոնե դեմքով ճանաչեն, դրանից հասկացել է, որ «իրենց աշխատողն է»: Մինչդեռ դատարանում վկան դժվարացավ հիշել, թե ով է իրեն բանկային քարտը տվել:

Այսօրվա նիստին ներկայացել էր անջատված մասով մեղադրյալ, Կոտայքի մարզի դատարանի դատական կարգադրիչների ստորաբաժանման ղեկավար Հայկ Մարգարյանը:

Նա հրաժարվեց ցուցմունքներ տալուց ու հարցերին պատասխանելուց, ինչպես նաև՝ իր իսկ նախաքննական ցուցմունքներից: Դրանցում նա հայտնել էր, որ իր ստորաբաժանումում գրանցված, սակայն փաստացի չաշխատող անձինք են եղել, իրեն ասվել է. «Ղեկավարությունը տեղյակ է, նրանք գտնվում են այլ ստորաբաժանումներում, գործուղման մեջ»:   

Այս փուլում իր պաշտպան Արմեն Ֆերոյանի ծառայություններից հրաժարվելու մասին հայտարարեց ամբաստանյալ Անգին Ղուկասյանը՝ նշելով, որ հարցաքննվող վկաները չեն առնչվում իր հետ:

Միսակ Մարտիրոսյանը հայտարարեց, որ 5 վկաներ ուղղակիորեն առնչվում են իր հետ, իսկ դատարանն էլ զգուշացրեց, որ հակասությունների առկայության դեպքում պաշտպանի առկայությունն անհրաժեշտ է. տվյալ դեպքում հակասություններ կան ամբաստանյալներ Անգին Ղուկասյանի ու Միսակ Մարտիրոսյանի շահերի միջև: