Փաստ ինֆո

Թվում էր, թե շաբաթ օրը պետք է լիներ Քելի Էրքերի և բժիշկ Ջորջ Սկոտ Սամսոնի կյանքի ամենաերջանիկ օրը, քանի որ Ամերիկայի Ինդիանա նահանգում բնակվող զույգն ամուսնացել էր այդ օրը: Սակայն նրանք երկուսն էլ մահացել են նախքան հարսանեկան գիշերը:

Ինչպես հայտնում են իրավապահները, Տերե Հութե քաղաքի «Union» հիվանդանոցի անեսթեզիոլոգ Սամսոնն իրենց տանը՝ միմյանց հետ հավատարմության խոստում փոխանակելուց մի քանի ժամ հետո, կրակել է հարսի վրա, այնուհետև՝ իրեն:

Համայնքի շերիֆը հայտնել է, որ որոշ հյուրեր լարվածություն են նկատել հարսի և փեսայի հարաբերություններում:

Վերջին հյուրի հեռանալուց կարճ ժամանակ անց համայնքի դիսպետչերական կենտրոնն ահազանգ է ստացել: Առաջին ահազանգը Քելիից էր, ով հասցրել է միայն տան հասցեն ասել, որից հետո կապն ընդհատվել է:

Երկրորդ անգամ ահազանգի ժամանակ կնոջ ձայնն ասել է.«Նա ծեծում է ինձ, նրա ձեռքին ատրճանակ կա», իսկ երրորդ զանգի ժամանակ արդեն ատրճանակի կրակոց է լսվել:

Երբ իրավապահները ժամանել են դեպքի վայր, նրանց դիմավորել է Սամսոնի տարեց հարազատներից մեկը, ով իրավապահներին ուղեկցել է ննջասենյակ, որտեղ հայտնաբերվել է Քելիի դին:

Նրա վրա Սամսոնը կրակել էր բազմաթիվ անգամ:

Բացի Սամսոնի հարազատից, տանը գտնվել է նաև Քելիի 10-ամյա երեխան, ով գտնվում էր ննջարանում՝ մոր դիակի մոտ:

Տարեց մարդն իրավապահներին հայտնել է, որ Սամսոնը ննջարանի պատուհանից փախել է նկուղ, որտեղ իրավապահները հայտնաբերել են նրա դին՝ կողքին ատրճանակը: