Փաստ ինֆո

2,5 տարեկան Լիա Միսակյանի՝ «Արաբկիր» բժշկական համալիրում մահվան գործով այսօր հարցաքննվեց քիթ-կոկորդ-ականջաբան, փորձագետ Սեյրան Հովհաննիսյանը՝ ընդգծելով,  որ երեխայի մահվան պատճառը, ինչպես նշված է հանձնաժողովային դատաբժշկական փորձաքննության եզրակացության մեջ, ագրանուլոցիտոզն է:

Ըստ եզրակացության` Լիա Միսակյանի օբյեկտիվ և սուբյեկտիվ վիճակի ներկայացված անամնեզի տվյալների հիման վրա դրվել է նախնական ախտորոշում՝ սուր շնչառական վարակ, ֆեբրիլ (ջերմային) ցնցումներ, որը համապատասխանում է ընդունվելիս ստացիոնար հիվանդի բժշկական քարտում արձանագրված տվյալներին։

Փորձագետը նշեց, որ երեխայի՝ հիվանդանոց ընդունվելու օրը նշանակված հետազոտությունների և բուժման ծավալը համապատասխանել է դրված նախնական ախտորոշմանը և եղել է ցուցված:

Չնայած Լիա Միսակյանի բուժման ընթացքում ցուցաբերված թերություններին և բացթողումներին՝ փորձագետները նշել են, որ արյան հետազոտությունների նման  արդյունքների՝ լեյկոպենիայի և ագրանուլոցիտոզի ու իմունիտետի խիստ ընկճվածության պայմաններում, ախտաբանական փոփոխությունների՝ սեպտիկ բարդությունների զարգացման առանձնահատկություններով պայմանավորված՝ նշված թերությունների և բարդությունների ու Լիա Միսակյանի մահվան միջև անմիջական պատճառական կապ հաստատել հնարավոր չէ:

Ըստ երեխայի բժշկական ամբուլատոր քարտի՝ Լ.Միսակյանի պոլիկլինիկայի բուժանձնակազմի կողմից իրականացվել է ճիշտ և չափորոշիչներին համապատասխան ծավալով, և երեխայի մահվան հետ պատճառահետևանքային կապի մեջ գտնվող թերություններ կամ բացթողումներ թույլ չեն տրվել:

Փորձագետը գտնում է, որ բժիշկների կողմից թույլ են տրվել կազմակերպական թերություններ՝ կապված արյան անալիզը նշանակելու և դրանց պատասխանները ստանալուն հետևողական չլինելու առումով:

Նշենք, որ մեղադրողին չէր գոհացնում փորձագետի պատասխանները: Վերջինս նշեց, որ ինքը կրկնում է իր կողմից տրված փորձագիտական եզրակացությունը, իսկ եթե դա մեղադրողին չի գոհացնում,ապա դա այլ հարց է:

Այսօր դատարան էր հրավիրվել նաև հյուսվածքաբան-փորձագետը։ Ըստ նրա՝ երեխայի՝ հիվանդանոց ընդունվելու օրը թոքաբորբի սիմպտոմներ չեն եղել, իսկ երբ կատարվել է ռենտգեն հետազոտություն, նկատվել է նոր սկսվող թոքաբորբ, իսկ հիվանդության կայծակնային ընթացքը կարող էր մեկ օրում կամ կես օրում առաջանալ:

Ըստ փորձագետի՝ երեխայի հիմնական հիվանդությունը եղել է պլևրոպնևմոնիան, և մահն առաջացել է դրա հետևանքով:

Հաջորդ դատական նիստը տեղի կունենա հոկտեմբերի 30-ին: