Փաստ ինֆո

ԵԽԽՎ-ի՝ «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճը» վերնագրով զեկույցին անդրադարձել է «Հայկական Ժամանակ»-ը:

Ինչպես թերթն է նշում, բրիտանացի զեկուցողի հետ աշխատանքները, պարզվում է, որոշել են բոյկոտել նաև Արցախում, եթե զեկույցի վերնագիրը չփոխվի:

Այս մասին լրատվամիջոցին երեկ հայտնել է ԼՂՀ Նախագահի մամլո խոսնակ Դավիթ Բաբայանը:

«Երբ բանաձևի հեղինակը մի մարդ է, ով բացեիբաց պաշտպանում է Ադրբեջանի շահերը, հանդիսանում է ադրբեջանական լոբբիստ և միակն է, որ Ադրբեջանի նախագահական խայտառակ ընտրությունները համարել է նորմալ, պարզ է, որ այդ մարդը չի կարող լինել անկողմանակալ:

Այսպիսի քայլերն առաջին հերթին լուրջ մտահոգություններ պետք է առաջացնեն նույն Եվրոպայում, որովհետև կաշառակերության թափանցումը կարևորագույն այդ կառույցներ ունի անկանխատեսելի հետևանքներ»,- ասել է մամլո խոսնակը:

Նա միաժամանակ շեշտել է, որ այդ զեկույցն անհնարին է առանց Ստեփանակերտի, որովհետև պետք է գան Ստեփանակերտ, պաշտոնապես պետք է դիմեն Արցախին, որ ուզում են ինչ-որ հետազոտություն կատարել:

«Բայց եթե նման զեկույց պիտի պատրաստվի նման վերնագրով, մենք խորհուրդ կտանք հետևյալը՝ թող գնան Բաքու, այնտեղ արդեն պատրաստ է այդ զեկույցը, թե իրենց նախագահականն է պատրաստում դա, թե՝ ԱԳՆ-ն, թող գնան, փողը դնեն իրենց գրպանները, մեխանիզմները գիտեն, իսկ Արցախ չգան, ժամանակ կկորցնեն: Սա է մեր պատասխանը»,- ասել է ԼՂՀ Նախագահի մամլո խոսնակը:

Հոդվածն ամբողջությամբ կարող եք կարդալ «Հայկական Ժամանակ» օրաթերթի` 09.10.2014թ. համարում: