Փաստ ինֆո

Բանդայի գործով այսօրվա դատական նիստն անցավ թեժ մթնոլորտում: Դատարանի նախազգուշացմանն արժանացան մեղադրող Սասուն Խաչատրյանը, ամբաստանյալ Արտուշ Հակոբյանի պաշտպան Հովիկ Արսենյանը և ամբաստանյալ Դավիթ Գալստյանը:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր մեղադրողի միջնորդությամբ հրապարակվեցին գործից անջատված մասով ամբաստանյալ Քյարամ Ամոյանի նախաքննական ցուցմունքները: Որպես կասկածյալ տված ցուցմունքներում Ք.Ամոյանը նշել էր, որ իր հետ վերցրել է գազային ատրճանակ, որը գտել է իր տան հարակից շինությունից, և գնացել Դերժինսկի դպրոցի մոտ, այնտեղ են եղել այլ տղաներ ևս, իսկ գնացել էին «ռազբոյի» նպատակով:

Որպես մեղադրյալ հարցաքննվելու ժամանակ Ամոյանը նշել էր, որ իրեն անհասկանալի է «բանդա» հասկացողությունը, քանի որ ինքը ճանաչել է միայն  Գուգոյին: Ամոյանը նաև նշել է, որ ինքը տեղյակ չի եղել,  որ ավազակային հարձակում պետք է լինի, Գուգոն իրեն տվել է  դիմակ,  ասել՝   հագի մինչև կգամ, նա հագել է այն, սակայն մի քանի րոպե անց Ամոյանը հանել է դիմակը, քանի որ դա իր «խելքի բանը չի» ու գնացել: Որպես կասկածյալ հարցաքննվելու ժամանակ դիմակի մասին չի հայտնել,  քանի որ դրանով նա ոչ մի գործողություն չի կատարել ու, բացի այդ, իրեն այդ մասին նախկինում չեն հարցրել:

Պաշտպանական կողմը նախ նշեց, որ Ամոյանի երկու ցուցմունքներում կան  էական հակասություններ, ապա Հովիկ Արսենյանը հայտարարեց, որ ցուցմունքը չի ընկալվում հասարակական գիտակցությամբ, ուր մնաց թե իրավագիտակցությամբ: Պաշտպանի համար անհասկանալի է այն, որ Ամոյանը չի գնում հանցագործության, բայց դիմակ է հագնում,  հետո,  մի քանի րոպե անց,  հանում:  «Լավ,  նպատակը ո՞րն է… էտ մի փուչիկ բանը ուզում եք նստցնեք մարդկանց ուղեղներում, որ գիտե՞ք, սենց էլ է լինում»,- ասաց պաշտպանը:

Հովիկ Արսենյանի հայտարարությունն առաջացրեց մեղադրողի զայրույթը,  և նա՝   դիմելով պաշտպանին ասաց. «Պրոֆեսոնալ եղեք ու փաստերով խոսեք»:

Ապա պաշտպանը հայտարարեց, թե Քյարամ Ամոյանը նախաքննության ընթացքում իր այդ պաշտպանից հրաժարվել է նրա համար, որ նա ասել է՝   այդպես գրի,  դա քեզ փրկում է:

Նախագահող դատավոր Մեսրոպ Մակյանն էլ իր հերթին հակադարձեց  պաշտպանին՝ հարցնելով, թե  ինչու իր գործընկերոջ հարցը չի բարձրացնում Փաստաբանների պալատում,  եթե հավաստի տեղեկություններ ունի: «ժամանակի խնդիր է»,- ասաց պաշտպանը:

Մեղադրողը զայրացած հայտարարեց, որ պաշտպանը «շոու է սարքում»: Պաշտպանի խոսքերից ոգևորվեց ամբաստանյալ Դավիթ Գալստյանն ու իր պահվածքի համար նախազգուշացվեց՝ մեղադրողի նկատմամբ անվայել արտահայտություններ անելու պատճառով: Պաշտպան Արսենյանն էլ իր դատավարական իրավունքները չարաշահելու համար արժանացավ դատարանի նախազգուշացմանը: Դատարանը նաև արձանագրեց, որ պաշտպանն իր պահվածքով արդեն մի քանի անգամ  բորբոքում է   դատական նիստի մթնոլորտը, ինչի  վառ ապացույցն  է ամբաստանյալի դրսևորած վարքագիծը:

Դատարանը պաշտպանին զգուշացրեց, որ հաջորդ անգամ կրկնվելու դեպքում ստիպված կլինի դիմել Փաստաբանական պալատ՝ իր նկատմամբ կարգապահական վարույթ հարուցելու միջնորդությամբ: «Դատարանը պաշտպանի գործողությունների մեջ դիտավորություն է տեսնում՝ դատական նիստի կարգը խանգարելու հետ կապված»,- նշեց նախագահող դատավորը:

Մեղադրողը ևս նախազգուշացվեց՝ առանց դատարանի թույլտվության  հայտարարություններ անելու համար: