Փաստ ինֆո

ՄԻԵԴ-ում Հայաստանի դատավորի թեկնածուների ընտրության հարցազրույցի փուլը հաղթահարեցին 11 հավակնորդներ:

Երեկ ուշ երեկոյան՝ հարցազրույցների ավարտից հետո, մրցութային հանձնաժողովն անցել է մրցույթի վերջին` քվեարկության փուլին, որի ընթացքում ամփոփվել են արդյունքներն ու հանձնաժողովի անդամների քվեարկությամբ ընտրվել առավելագույն միավորներ վաստակած 3 թեկնածուները:

Նախատեսվում է, որ այսօր արդեն հանձնաժողովը կհրապարակի թեկնածուների ցուցակն ու նրանց ստացած միավորները:

Դրանից հետո ամենաբարձր միավորներ ստացած 3 մասնակիցները կընդգրկվեն մրցույթում հաղթող ճանաչվածների ցուցակում:

Ի դեպ, եթե նրանք 3-ն էլ նույն սեռի են, ապա հանձնաժողովն իր որոշմամբ նրանցից առավել ցածր միավոր ստացածին փոխարինում է հարցազրույցի փուլի գնահատման արդյունքում ամենաբարձր միավոր ստացած հակառակ սեռի մասնակցով:

Միևնույն ժամանակ, սեռերի ներկայացվածության սկզբունքից բացառություն, գործող կարգով, թույլատրվում է, եթե հանձնաժողովը ծանրակշիռ փաստարկներով կամ բացառիկ հանգամանքների մատնանշմամբ հիմնավորում է դրա պահպանման անհնարինությունը:

Ինչևէ, արդեն վերջնական ցուցակը կազմելու հաջորդ օրվա ընթացքում հանձնաժողովը պարտավոր է այն հրապարակել պաշտոնական կայքերում և հրապարակման օրվան հաջորդող օրվանից սկսած մինչև մրցույթը հայտարարելու օրվան հաջորդող 50-րդ օրն այն ներկայացնել ՀՀ նախագահի հաստատմանը:

Ի դեպ, ցուցակի հետ նախագահին են ներկայացվում նաև հանձնաժողովի նիստերի արձանագրությունները, մրցույթի ընթացքում ներկայացված և ձեռք բերված փաստաթղթերը:

Ցուցակն ստանալուն հաջորդող հինգ օրվա ընթացքում ՀՀ նախագահն այն հաստատում կամ մերժում է:

Հաստատված ցուցակն այնուհետև ներկայացվում է Եվրոպայի խորհրդի խորհրդարանական վեհաժողովին, որն էլ ընտրում է 3 թեկնածուներից նրան, ով պետք է ներկայացնի Հայաստանը Մարդու իրավունքների եվրոպական դատարանում:

Դե իսկ ՀՀ նախագահի, կամ ԵԽԽՎ-ի կողմից մերժվելու դեպքում Հայաստանում հայտարարվում է նոր մրցույթ: