Փաստ ինֆո

Ֆինանսների նախարարությունում կատարել են վարչապետ Հովիկ Աբրահամյանի հանձնարարությունն ու օրենսդրական նոր նախաձեռնություն ներկայացրել, որով «Շրջանառոթյան հարկի մասին» նոր օրենքով նախատեսված պարտադիր գույքագրման պահանջը սույն թվականի հոկտեմբերի առաջին տասնօրյակից տեղափոխվելու է 2015 թվականի փետրվարի 1-ը:

Հիշեցնենք՝ հոկտեմբերի 6-ին Հովիկ Աբրահամյանը կառավարության շենքի դիմաց բողոքի ակցիա իրականացնող ՓՄՁ ներկայացուցիչների հետ հանդիպումից հետո հանձնարարել էր ֆինանսների նախարարին 3-օրյա ժամկետում մշակել և կառավարության քննարկմանը ներկայացնել համապատասխան օրենքի նախագիծ:

Եվ ահա, ինչպես տեղեկանում ենք ՀՀ կառավարության պաշտոնական կայքից, նախագիծը մշակվել է ու վաղն արդեն կներկայացվի կառավարության հաստատմանը:

Նախագծում օրենքի միայն մեկ հոդված է առաջարկվում փոխել:

«2014 թվականի հունիսի 21-ի «Շրջանառության հարկի մասին» Հայաստանի Հանրապետության օրենքում փոփոխություններ և լրացումներ կատարելու մասին» oրենքի 12-րդ հոդվածով սահմանված` ապրանքներ ձեռք բերելու պարտադիր փաստաթղթավորման պահանջը չի տարածվում սույն օրենքն ուժի մեջ մտնելուց հետո մինչև 2015 թվականի փետրվարի 1-ն ընկած ժամանակահատվածում որևէ օրվա դրությամբ առկա ապրանքային մնացորդի վրա, որի մասին հարկ վճարողները մինչև 2015 թվականի փետրվարի 1-ն իրենց հաշվառման վայրի հարկային մարմին են ներկայացնում վերադաս հարկային մարմնի ղեկավարի հաստատած ձևի տեղեկանք»,- ասված է նախագծում:

Մինչ այդ, հիշեցնենք, այս պահանջը տարածվում էր մինչև 2014 թվականի հոկտեմբերի 1-ը ձեռք բերված և 2014 թվականի հոկտեմբերի 1-ի դրությամբ առկա ապրանքային մնացորդի վրա, որի մասին հարկ վճարողները հարկային մարմին պետք է տեղեկանք ներայացնեին մինչև ս.թ. հոկտեմբերի 10-ը :

Այլ կերպ ասած` ՓՄՁ դժգոհությունն առաջացրած օրենքում կառավարությունը միայն փաստաթղթավորման ժամկետն է հետաձգում, այն էլ՝ ընդամենը 3 ամսով:

Ընդ որում, այս զիջումը ֆիննախի հեղինակած նախագծում հետևյալ մեկնաբանությունն է ստացել. «Առևտրական գործունեությամբ զբաղվող հարկ վճարողները դժվարանում են վերոնշյալ անցումային ժամանակահատվածում հաշվառել իրենց ապրանքային մնացորդները և համապատասխան տեղեկատվություն ներկայացնել հարկային մարմիններին, ինչը պայմանավորված է տնտեսավարող սուբյեկտների մոտ առկա ապրանքային մնացորդների ծավալներով, ինչպես նաև՝ ապրանքային մնացորդների ձևանմուշի լրացման հմտությունների պակասով»:

Իսկ ինչ վերաբերում է 3 ամսում անհրաժեշտ հմտություններ ձեռք բերելուն, ապա, հիշեցնենք, հոկտեմբերի 6-ին վարչապետը ֆինանսների նախարարին հանձնարարել էր նաև 20-օրյա ժամկետում ներկայացնել առաջարկություններ՝ գույքագրման ձևանմուշը հնարավորինս պարզեցնելու, տնտեսվարողների շրջանում գույքագրման գործընթացի պատշաճ կազմակերմանն ուղղված անհրաժեշտ ուսուցողական դասընթացների անցկացման և այլ անհրաժեշտ վարչարարական քայլերի վերաբերյալ:

Սրանց մասին կառավարության նիստում ներառված նախագծում առայժմ որևէ առաջարկ չկա: