Փաստ ինֆո

Tert.am-ի տեղեկացմամբ՝ Մարդու իրավունքների եվրոպական դատարանում (ՄԻԵԴ) ՀՀ դատավորի 2 թեկնածու ուշ երեկոյան ՀՀ վճռաբեկ դատարանի շենքում են եղել, քանի որ մրցութային հանձնաժողովը թեկնածուների գրանցման հետ կապված նրանցից պարզաբանումներ ստանալու անհրաժեշտություն է տեսել:

Այս մասին լրատվամիջոցին տեղեկացրել է Եվրոպական դատարանում ՀՀ դատավորի ընտրության մրցութային հանձնաժողովի անդամ Արա Զոհրաբյանը՝ պատասխանելով հարցին, թե ինչու են Երևանի Կենտրոն և Նորք-Մարաշ ընդհանուր իրավասության դատարանի դատավոր Արայիկ Մելքումյանը մրցույթի ավարտից հետո հայտնվել Վճռաբեկի շենքում, մինչև կեսգիշեր փակված մնացել հանձնաժողովի անդամների հետ:

«Հանձնաժողովի նիստում, երբ գնացինք որոշում կայացնելու, ինչպես հանձնաժողովի նիստը վարողը հրապարակել էր, քննարկման առարկա էր դառնալու նաև մամուլում տեղ գտած այն հարցը, որ 3 թեկնածուների գրանցման հետ կապված խնդիր կա: Եթե հիշում եք ինքս էլ հրապարակայնորեն հարցում կատարեցի և աշխատակազմից պարզաբանումներ խնդրեցի: Օրակարգի հենց առաջին հարցը նվիրված էր թեկնածուների գրանցմանը և թեկնածուներից 2-ի վերաբերյալ պարզաբանումներ պահանջելու անհրաժեշտություն առաջացավ»,- ներկայացրեց Արա Զոհրաբյանը:

Վերջինս էթիկական տեսանկյունից ճիշտ չհամարեց հրապարակել, թե ով է եղել մյուս թեկնածուն:

«Այսօր անունները հրապարակելուց հետո, ինչպես հանձնաժողովն է որոշում կայացրել, արձանագրությունը նույնպես հանրությանը հասանելի կդառնա և այնտեղ հանձնաժողովի նիստում ամբողջ տեղի ունեցածը նկարագրված է: Եվ այդ երկու թեկնածուներին հրավիրելու հանգամանքը նույնպես»,- ավելացրեց Արա Զոհրաբյանը:

Ի պատասխան հարցի, թե շատ չէին խախտումները, Արա Զոհրաբյանը նկատեց, որ որոշակի շեղումներ կան, բայց դրանք էական չեն և չեն ազդել մրցույթի վրա:

Հիշեցնենք, որ այսօր Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովի աշխատակազմը կներկայացնի ՄԻԵԴ-ում ՀՀ դատավորի երեք թեկնածուների անունները՝ համաձայն հարցազրույցի փուլն անցած մասնակիցների հավաքած միավորների, որոնք մինչև մրցույթի ավարտը գաղտնի են պահվում:

Ըստ գործող կարգի՝ թեկնածուներին ներկայացվող պահանջները գնահատվում են 100 միավորանոց համակարգով, որից անձնական հատկանիշները` 20, մասնագիտական որակները` 55 և լեզվական կարողությունները` առավելագույնը մինչև 25 միավոր:

Մեր տեղեկություններով՝ երեք թեկնածուներից և ոչ մեկը չի հավաքել 100 միավոր: Մամուլում նշվեց, որ հանձնաժողովը հատուկ սևեռված է եղել իրավաբան Վահե Գրիգորյանի վրա, նրան է «քրքրել»: Արա Զոհրաբյանը, ի պատասխան նկատեց, որ «բոլոր թեկնածուներին էլ «քրքրել են»»:

Նշենք, որ վերջնական ցուցակը կազմելու հաջորդ օրվա ընթացքում հանձնաժողովը պարտավոր է այն հրապարակել պաշտոնական կայքերում և հրապարակման օրվան հաջորդող օրվանից սկսած մինչև մրցույթը հայտարարելու օրվան հաջորդող 50-րդ օրն այն ներկայացնել ՀՀ նախագահի հաստատմանը: Եթե ՀՀ նախագահը չի ստորագրում, անցկացվում է նոր մրցույթ:

Լուսանկարը՝ Ֆոտոլուրի