Փաստ ինֆո

ՄԻԵԴ-ում ՀՀ դատավորի 3 թեկնածուների անուններն արդեն հայտնի են: Երկարատև ու թեժ պայքարից հետո մրցութային հանձնաժողովի կողմից, ինչպես արդեն հայտնել ենք, ընտրվել են Արմեն Հարությունյանը, Արա Ղազարյանն ու Նելիկ Հարությունյանը: Նրանց անուններն այսօր կամ վաղը կներկայացվեն ՀՀ նախագահի հաստատմանը, ապա` ԵԽԽՎ-ի վերջնական ընտրությունը:

Բայց մինչ այդ հրապարակվել է նաև մրցութային հանձնաժողովի վերջին նիստի արձանագրությունը, որից տեղեկացանք, որ մրցույթի վերջնական արդյունքները հաշվարկվել են ոչ թե 11, այլ՝ 9 թեկնածուների արդյունքներով:

Բանն այն է, որ հանձնաժողովը որոշակի կասկածներ է ունեցել 2 հավակնորդների` Արայիկ Մելքումյանի ու Նորա Կարապետյանի գրանցման վերաբերյալ, քանի որ, ինչպես նշված է արձանագրության մեջ, ներկայացրած «գործի նյութերը բավարար չեն եղել՝ եզրահանգման գալու համար»:

Ուստի՝ որոշվել է պարզաբանման համար հրավիրել Արայիկ Մելքումյանին ու Նորա Կարապետյանին: Սակայն նրանք, ներկայանալով, պարզաբանման փոխարեն հանձնաժողովին դիմում են ներկայացրել` խնդրելով հանել իրենց գրանցման ցուցակից և իրենց մասով չամփոփել հարցազրույցի արդյունքները:

Այսպիսով, նախապես գրանցված 14 մասնակիցներից վերջին փուլից հետո մնացել են 9-ը:

Ինչ վերաբերում է արդյունքներին, ապա, ըստ հրապարակված արձանագրության, թեկնածուների ստացած միավորները հետևյալն են.

Արմեն Հարությունյան 95.67միավոր

Արայիկ Ղազարյան 84.05 միավոր

Վիգեն Քոչարյան 81.27 միավոր

Վահե Գրիգորյան 72.66 միավոր

Եղիշե Կիրակոսյան 71.58 միավոր

Դավիթ Խաչատուրյան 70. 93 միավոր

Դավիթ Հակոբյան 69.6 միավոր

Նելիկ Հարությունյան 58.05 միավոր

Լիզա Գրիգորյան 57.01 միավոր

Այսպիսով, ըստ միավորների, առաջին 3 տեղում տղամարդիկ են: Բայց քանի որ գործող կարգը պահանջում է, որպեսզի, թեկնածուներից գոնե մեկը կին լինի, հանձնաժողովը որոշել  է 3-րդ տեղը զբաղեցրած Վիգեն Քոչարյանի փոխարեն ցուցակում ընդգրկել ամենաբարձր միավոր ստացած հակառակ սեռի մասնակցին, տվյալ դեպքում` Նելիկ Հարությունյանին:

Նման ընթացակարգ է սահմանում ՀՀ նախագահի կողմից հաստատված կարգը: