Փաստ ինֆո

Ամերիկացի դեռահասն իր ծնողներին հրաժեշտի նամակ էր գրել՝ նախքան «Իսլամական պետությանը» միանալու նպատակով արտերկիր թռչելու փորձ կատարելը:

Մոհամեդ Համզա Խանը ձերբակալվել է շաբաթ երեկոյան՝ «O'Hare» միջազգային օդանավակայանում: Այս մասին հայտնել են դաշնային ծառայության աշխատակիցները:

19-ամյա երիտասարդը կներկայանա դատարան՝ ահաբեկչական կազմակերպությանը նյութական օգնություն ցուցաբերելու փորձ կատարելու մեղադրանքով:

Ըստ նախապատրաստված նյութերի՝ Խանը Վիենայից պետք է թռչեր Ստամբուլ:

Իրավապահները Խանի իրերում ձեռագիր նյութեր են հայտնաբերել, այդ թվում՝ «ԻՊ»-ի դրոշի նկարը, ինչպես նաև՝ արաբերենով գրված «Միացիր ջիհադներին» մի գրություն:

Խանն իր ծնողներին հրաժեշտի նամակ էր գրել, որտեղ ասվում էր. «Առաջին հերթին խնդրում եմ, որ ոչ մի դեպքում իրավապահներին չասեք այս մասին: Որովհետև եթե դա տեղի ունենա, կվտանգվի ոչ միայն մեր, այլև՝ մեր ամբողջ ընտանիքի անվտանգությունը: Մենք բոլորս այն բանի ականատեսն ենք, որ արևմուտքի հասարակությունն օրեցօր անբարոյական է դառնում: Ես չէի ցանկանա, որ իմ երեխաները տեսնեն այս գարշելի երևույթները»:

Խանն իր ընտանիքի անդամներին ևս կոչ էր անում միանալ իրեն Իրաքում և Սիրիայում «Իսլամական պետության» վերահսկողության տակ գտնվող տարածքներում:

Ըստ նախապատրաստված նյութերի՝ նա քննիչներին հայտնել է, որ ինչ-որ մեկը համացանցով «Իսլամական պետության» հետ կապվելու համար հեռախոսահամար էր տրամադրել նրան, և նա Ստամբուլ հասնելուն պես՝ պետք է զանգահարեր այդ հեռախոսահամարով: