Փաստ ինֆո

26-ամյա Արթուր Շահինյանը, ով մեղադրվում է շահադիտական դրդումներով 75-ամյա կնոջը՝ Անյա Մուսայելյանին, սպանելու մեջ իրեն առաջադրված մեղադրանքում մեղավոր չի ճանաչում:

Այսօր  վերջապես գործով սկսվեց դատաքննությունը: Պարզ դարձավ նաև, որ ամբաստանյալի շահերը կներկայացնի նախորդ պաշտպանը՝ Կարեն Քամալյանը, ով  նախաքննության փուլում ևս ներկայացրել է ամբաստանյալի շահերը, սակայն դատարանում ամբաստանյալը հրաժարվել էր նրա ծառայություններից:

Մեղադրող դատախազը հրապարակեց մեղադրական եզրակացության եզրափակից մասը, համաձայն որի Արթուր Շահինյանը 2013թ. հուլիսի 19-ի  գիշերը հագնելով իր հետ վերցրած բժշկական ձեռնոցները քննությամբ չպարզված անձի հետ աննկատ մուտք է գործել Էմինեսկուի փողոցի թիվ 19/Ա տուն և սկսել ոսկյա զարդեր փնտրել տան ննջասենյակում և հյուրասենյակում, ապա Մուսայելյանի որդու պահարանի դուռը բացելով դուրս է բերել մետաղյա չհրկիզվող պահարանը և դրա միջից հափշտակել է Մուսայելյանին պատկանող ոսկյա զարդերը, բացի այդ Մուսայելյանի  որդու մահացած կնոջ ոսկյա զարդերը, որից հետո Անյա Մուսայելյանը նկատել է նրան և քննությամբ չպարզված անձին և բղավել:

Արթուր Շահինյանը քննությամբ չպարզված անձի հետ հարձակվել են Անյա Մուսայելյանի վրա,  Շահինյանը նրան քաշելով տեղափոխել է տան ետնամասի բակի կողմ տանող դռան մոտ, Անյա Մուսայելյանը դիմադրել է ճանկռելով Շահինյանին և նրա քննությամբ չպարզված հանցակցին, որի արդյունքում Ա. Մուսայելյանի ձեռքի եղունգների տակ մնացել է վերջինիս արյան հետքերը:

Ա. Մուսայելյանի դիմադրությունը հաղթահարելու ընթացքում նրանք սուր կտրող ծակող գործիքով վնասել են Մուսայելյանի աջ դաստակը, իսկ Շահինյանը, ձախ ձեռքի արմունկային հատվածով սեղմելով Մուսայելյանի պարանոցից, դիտավորությամբ փորձել է խեղդամահ անել՝ անշարժացրել է նրան, պառկեցրել հատակին և նրա մատերից հանել է ամուսնական ոսկյա մատանին և մեկ ուրիշ մատանի՝ ադամանդե քարերով:

Դրանից հետո շարունակել է տան ննջասենյակում ոսկեղեն փնտրել, սակայն ոչինչ չգտնելով Շահինյանը վերադարձել է միջանցք և տեսնելով, որ Ա. Մուսայելյանը ողջ է, սողալով մոտեցել է դռանը և բացել այն, մոտեցել է, կրկին բռնել է նրա պարանոցից՝ սեղմելով, խեղդելու եղանակով դիտավորյալ կյանքից ապօրինի զրկել նրան:

Ապա գնալով խոհանոց,  վերցրել է 2 սրբիչներ, որոնցից մեկով մաքրել է հատակի արյունը, մյուսով հնարավոր բոլոր հետքերը, և քննությամբ չպարզված անձի հետ դուրս եկել տանից, դիմել փախուստի՝ Ա. Մուսայելյանին պատճառելով 4 մլն 510 հազար ՀՀ դրամի վնաս:

Արթուր Շահինյանին մեղադրանք է առաջադրվել՝ մի խումբ անձանց կողմից, շահադիտական դրդումներով դիտավորյալ սպանություն կատարելու համար՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով:

Դատարանի կողմից սահմանված ապացույցների հաջորդականության համաձայն՝ առաջինը ցուցմունք է տվել տուժողի իրավահաջորդը՝ մահացած կնոջ որդին: Նրա խոսքով՝ դեպքի օրը ինքը և որդիները Հայաստանում չեն եղել, դեպքի մասին էլ տեղեկացել է իր ընկերոջից՝ հեռախոսազանգի միջոցով:  Ըստ տուժողի իրավահաջորդի՝ ավազակային հարձակումը կատարվել է շատ հապճեպ, քանի որ թե իր կոստյումի և թե մոր շորերի գրպանում եղած գումարները չեն վերցրել:

Տուժողի իրավահաջորդը նաև նշեց, որ ցանկանում է քաղհայց ներկայացնել պահանջով, որ, բացի գույքային վնասից, իրեն փոխհատուցվի իր կողմից  փաստաբանին վճարված գումարները, մոր հուղարկավորության և գերեզմանի հարդարման  ծախսերը:

Հաջորդը հարցաքննվեց վկա Սերգեյ  Թորոսյանը: Վկան ճանաչում էր միայն ամբաստանյալին, նա տաքսու վարորդ է եղել, իսկ ամբաստանյալը օգտվել էր նրա ծառայություններից: Մի օր էլ ամբաստանյալը զանգահարել է իրեն և ասել, որ ցանկանում է իր մեքենան գնել, և նշել է, որ իր ընկերուհին է գումարը տալու, սակայն ամբաստանյալի ընկերուհին չի «հավանել» իր մեքենան և գնացել են ավտոշուկա ու այնտեղից գնել ավտոմեքենա՝ 4000 ԱՄՆ դոլարի սահմաններում: Վկան նշեց, որ այդ գումարը տրվել է ոչ իր ներկայությամբ:

Դատարանում վկան նաև նշեց, որ ամբաստանյալի վրա որևէ իր չի տեսել:

Վկայի նախաքննական և դատաքննական ցուցմունքներում էական հակասությունների պատճառով մեղադրողը միջնորդեց հրապարակել նախաքննական ցուցմունքները, որտեղ նշվում է, որ մեքենան գնել են 3000 ԱՄՆ դոլարով, ամբաստանյալի մոտ 1000 դոլարից ավել գումար է մնացած եղել, բացի այդ նրա վրա եղել է նաև 2 ոսկյա շղթա՝ վկան անգամ նկարագրել էր նրանց գույն ու հաստությունը:

Ըստ այդ ցուցմունքների՝  ավտոմեքենան գնելուց 2 օր անց էլ ամբաստանյալը զանգահարել է նրան և խնդրել, որ եթե որևէ մեկը հարցնի, ապա չասի, որ կանխիկ գումարով է գնել, այլ ասի, որ ապառիկ է գնել: Վկան նաև քննիչի մոտ հայտնել է, որ այդ ժամանակ ինքը մտածել է,  որ ոստիկանության հետ կապված է երևի:

Վկան ամեն կերպ խուսափում էր այս դրվագի մասին որևէ կոնկրետ պատասխան տալուց՝ փորձելով այլ ուղղություն տանել հարցերը, սակայն դատարանը նրան հիշեցրեց կեղծ ցուցմունք տալու մասին, որին հետևեց պատասխան, որ ներկայումս չի հիշում, որ այդպիսի բան է եղել, ու նաև հավելեց, որ ինքը կեղծ ցուցմունք չի տվել, պնդելով նախաքննական ցուցմունքները, և եթե ներկայումս ինչ-ինչ բաներ չի ասում, ապա կապված է հիշողության հետ, քանի որ բավականին ժամանակ է անցել:

Նոյեմբերի 4-ին կայանալիք հաջորդ նիստում վկաների հարցաքննությունը կշարունակվի: