Փաստ ինֆո

Դատական դեպարտամենտի նախկին ղեկավար Միսակ Մարտիրոսյանի ու մյուսների գործով այսօրվա դատական նիստում   հարցաքննվեցին  գործում առկա կաշառքի դրվագներով վկաներ:

Լիլիա Պետրոսյանը, ով ժամանակին դատական ծառայող է եղել, հայտնեց, որ իմանալով, որ «աշխատանքի տեղ կա», դիմել է Դատական դեպարտամենտի  անձնակազմի կառավարման վարչության պետ Անգին Ղուկասյանին, ով  հազար դոլարի դիմաց խոստացել է աշխատանքի տեղավորել վկայի  եղբորորդուն:   Հազար դոլարն, ըստ վկայի, միայն Անգին Ղուկասյանի համար չէր, այլ նաև Միսակ Մարտիրոսյանի համար: Վկան իր նախաձեռնությամբ  Անգին Ղուկասյանին 30  հազար ՀՀ դրամ արժողությամբ բիժուտերիա   ու մի տուփ կոնֆետ է նվիրել:

Այդուհանդերձ, ըստ վկայի խոստումը չի կատարվել, եղբորորդին դարձել պայմանագրային աշխատող և ոչ թե դատական ծառայող: 

Վկան հայտարարեց, որ  ինքը Կազմակերպված հանցավորության դեմ պայքարի վարչությունում հայտարարություն տվել է այն բանից հետո, երբ իրեն պարզաբանել են, որ եթե «եթե իմ կամքով  ասեմ՝ ինչ արել եմ, քրեական պատասխանատվության չեմ ենթարկվի»:

Վկա Վիկտորիա Կարապետյանը  15 րոպեով հրավիրվել է ոստիկանություն՝ որոշ հարցերի,  մասնավորապես, աշխատանքի ընդունվելու հանգամանքների  վերաբերյալ պարզաբանումներ  տալու: Ըստ վկայի, ինքը աշխատանքի ընդունվելու հրամանագրումից հետո Միսակ Մարտիրոսյանին 4,3 գր քաշով ռուսաց Նիկոլայ ցարի դիմերեսով ոսկե մետաղադրամ ու կես լիտր տարողությամբ «Նապոլեոն» կոնյակ է նվիրել՝  Միսակ Մարտիրոսյանի ծննդյան օրվա կապակցությամբ:

Մինչդեռ ոստիկանությունում տված հայտարարության մեջ վկան  այլ շեշտադրումներ էր արել:  Նա  հայտնել էր, որ  Վարչական վերաքննիչ դատարանում արխիվապահի պաշտոնում նշանակվելու համար  իրենից 500 դոլարի մաղարիչ է պահանջվել: Վկան դատարանում հայտարարեց, որ ոստիկանությունում իրեն ուղղորդել են:

Վկա, Վարչական դատարանի դատական կարգադրիչների ստորաբաժանման ղեկավար պաշտոնավարած Արտյոմ Մամյանը  հայտնեց, որ  տեղեկագրերում հաշվառել է փաստացի ստորաբաժանումում չաշխատող թվով 7  անձանց, որովհետև  Դատական կարգադրիչների ծառայության ղեկավարի առաջին տեղակալ Գեղամ Գրիգորյանը  հայտնել է, որ նրանք գործուղված են այլ տեղ աշխատելու:

Վկա Սամվել Ալեքսանյանը, ով պաշտոնավարել է որպես  Արաբկիր ու Քանաքեռ-Զեյթուն վարչական շրջանների դատարանի դատական կարգադրիչների  ստորաբաժանման ղեկավար, հայտնեց, որ փաստացի իր ղեկավարած ստորաբաժանումում չաշխատող  4 անձանց  հաշվառել է տեղեկագրերում՝  Գեղամ Գրիգորյանի բանավոր ցուցումով:  «Ինչո՞ւ Գեղամ Գրիգորյանի ցուցումով» հարցին ի պատասխան վկան ասաց, որ նա է կոորդինացնում դատական կարգադրիչներին, իսկ  ծառայության ղեկավարն  ի՞նչ է անում՝  վկան բազմանշանակ պատասխանեց.  «դե, ղեկավարն ի՞նչ է անում»:

Հաջորդ դատական նիստի մասին կծանուցվեն ևս 20 վկա:  Վկաներն  ընդհանուր առմամբ 99-ն են: