Փաստ ինֆո

Անչափահաս կնոջը խոշտանգելու համար Սյունիքի մարզի 24-ամյա բնակիչը դատապարտվել է ազատազրկման՝ 3 տարի ժամկետով, սակայն նրա նկատմամբ նշանակված պատիժը պայմանականորեն չի կիրառվի, քանի որ սահմանվել է փորձաշրջան՝ 2 տարի ժամկետով։

Ըստ մեղադրանքի` Սյունիքի մարզի բնակիչ, թիվ N զորամասի զինծառայող Վրեժն ամուսնական հարաբերությունների մեջ է գտնվել անչափահասի հետ ու կասկածել, որ նա իրենից գաղտնի շփվում է ուրիշ տղամարդու հետ:

Արդյունքում` անչափահաս կնոջ նկատմամբ բռնություն է գործադրել` դիտավորությամբ նրա մարմնի տարբեր մասերին պարբերաբար հարվածներ հասցնելու եղանակով պատճառել ուժեղ ցավ, ապա զրկելով շարժվելու հնարավորությունից, նրա կամքին հակառակ՝ կտրել գլխի մազերը, իսկ երբ կինը, ազատվելով նրա ձեռքից, փախել է տնից, Վրեժը բռնել է նրան և ձեռքը ոլորելով վերադարձրել տուն` իր գործողություններով կնոջը պատճառելով հոգեկան տառապանք և առողջությանը թեթև վնասի հատկանիշներ չպարունակող մարմնական վնասվածքներ:

Պարզվել է, որ անչափահաս կինը նույն շարժառիթով այլ օրերի ևս ծեծի է ենթարկվել ամուսնու կողմի:

Երիտասարդին մեղադրանք է առաջադրվել երկու հոդվածով` խոշտանգելու եւ ծեծելու համար` ՀՀ քրեական օրենսգրքի 119-րդ հոդվածի 2-րդ մասի 3-րդ կետով և 118-րդ հոդվածով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Դատաքննության ընթացքում ամբաստանյալը և իր տուժող կինը դիմումներ են ներկայացրել` նշելով, որ հաշտվել են իրար հետ, իրարից պարտք ու պահանջ չունեն և միջնորդել են ՀՀ քրեական օրենսգրքի 118-րդ հոդվածի մասով (երկու դրվագով) քրեական գործի վարույթը կարճել ու դադարեցնել քրեական հետապնդումը: Դատարանը միջնորդությունը բավարարել է, տուժողի հետ հաշտության կապակցությամբ այդ մասով գործի վարույթը կարճվել է:

Իսկ խոշտանգման մասով, մինչ դատաքննությունն սկսելը, ամբաստանյալը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքում իրեն լիովին մեղավոր է ճանաչում:

Ամբաստանյալի պատասխանատվությունը և պատիժը մեղմացնող հանգամանքներ է դատարանը դիտել ամբաստանյալի կողմից իրեն լիովին մեղավոր ճանաչելն ու անկեղծորեն զղջալը, առաջին անգամ հանցանք կատարելը: