Փաստ ինֆո

ՄԻԵԴ-ում ՀՀ դատավորի թափուր պաշտոնի համար հայտարարված մրցութային գործընթացի շուրջ մեր երկրում կրքերն օրեցօր ավելի են թեժանում, բայց ոչ միայն այն պատճառով, որ մրցույթից դուրս են մնում, կամ հետագա պայքարից հրաժարվում են այդ պաշտոնի համար պայքարող որոշ հավակնորդներ:

Միջազգային այդ ատյանում ՀՀ ներկայացուցչի անձը, անշուշտ, կարևոր է, և հատկապես հենց մեր երկրի համար, ուստի նրա ընտրության գործընթացի շուրջ հասարակական հետաքրքրությունն էլ բնական է, որ պետք է լինի:

Բայց միևնույն ժամանակ գործընթացին հետևելիս հնարավոր չէ թոթափել այն զգացողությունը, որ այս հետաքրքրությունն ու թեժ պայքարը փոքր- ինչ ուռճացված են, կամ ասենք` արհեստականորեն հրահրված:

Նախ, գործընթացը դիտարկող ՀԿ-ներից միայն «Իրավունքի Եվրոպա Միավորում»-ն է «աննահանջ» պայքար մղում ընդդեմ «հովանավորչության» ու «ապօրինության» դրսևորումների: Մի կողմից, իհարկե, կարելի է ենթադրել, թե միայն այս հասարակական կազմակերպությունն է մրցույթի միակ անաչառ դիտորդը, բայց մյուս կողմից, ստիպված ենք անկեղծ լինել ու խոստովանել, որ նույնիսկ այս կազմակերպությունը չի կարող անաչառ կերպով դիտարկել ու գնահատել դատավորի թափուր մնացած աթոռի համար ծավալված պայքարը:

Բանն այն է, որ նույնիսկ ամենամեծ ցանկության դեպքում այս ՀԿ-ն դժվար է անկողմնակալ դիտորդ համարել, քանի որ, չմոռանանք, անկողմնակալ լինելու համար առաջին պայմանը սեփական շահեր չունենալն է, մինչդեռ «Իրավունքի Եվրոպա Միավորման» դեպքում ճիշտ հակառակն է. թեկնածուներից մեկը` փաստաբան Վահե Գրիգորյանը այս կազմակերպության ոչ թե շարքային անդամը, այլ` հիմնադիրներից մեկն է:

Իհարկե, «Փաստինֆո»-ի խնդրանքով օրեր առաջ մեկնաբանելով այս փաստը, Վահե Գրիգորյանը հայտնել էր, որ դադարեցրել է իր անդամությունը կազմակերպությանը: Հիշեցնենք, Վահե Գրիգորյանն ասել էր. «ՀԿ-ում իմ անդամությունը ոչ թե կասեցրել եմ, այլ այն առհասարակ դադարեցրել եմ հենց այն պատճառաբանությամբ, որ այս իրավապաշտպան ՀԿ կողմից դիտորդություն իրականացնելը այն գործընթացի նկատմամբ, որում ես մասնակից եմ, կարող է հանրության աչքում ստվերել թե այդ՝ դիտորդական գործընթացը, թե՝ իմ ընտրվելու դեպքում մրցույթը եւ այն վարող մրցութային Հանձնաժողովի գործունեությունը: Իմ անդամությունը «Իրավունքի Եվրոպա Միավորում» ՀԿ-ում կասեցնելու փոխարեն դադարեցրել եմ, քանի որ այն կասեցնելու դեպքում դեռ շարունակվում է կապվածությունը կազմակերպության հետ, իսկ դադարեցվելու դեպքում՝ այն անմիջապես եւ ամբողջությամբ դադարում է»:

Վահե  Գրիգորյանը նաև հայտնել էր, որ իր անդամության դադարեցման դիմումը ներկայացրել է մինչեւ այս մրցույթին դիմելը, իր խոսքով`«անցած ամսվա 23-ին», որի հիման վրա այդ պահին հենց նրա անդամությունը դադարեցվել էր:

Բայց արդյոք փաստաթղթային ձևակերպումը կարող է կանխել նաև հոգևոր ու հոգեբանական կապվածությունն ու ճնշումը:

Այս պարագայում, որքան էլ, որ ցավալի հնչի, մնում է միայն արձանագրել, որ ՄԻԵԴ-ում ՀՀ դատավորի ընտրության գործընթացում, նույնիսկ ամենաընդդիմադիր թվացող թեկնածուի պարագայում, անաչառություն ու անկողմնակալություն ակնկալել չի կարելի: