Փաստ ինֆո

Մեկ տարի առաջ` 2013թ. հոկտեմբերի 24-ին, Երևանի Դավիթ Մալյան փողոցի շենքերից մեկում՝ իր բնակարանում, հայտնաբերվել էր տանտիրուհու` Աննա Ստեփանյանի դին` դանակի 17 հարվածների հետքերով:

Ավելի ուշ իրավապահները պարզել էին, որ սպանությունը կատարվել էր նույն օրը՝ ժամը 15:00-17:00-ի սահմաններում: Մարդասպանը վիճաբանել էր իր զոհի հետ և սուր, ծակող-կտրող գործիքով հարվածել նրա մարմնի տարբեր մասերին` դեմքին, պարանոցին, կրծքավանդակին, ձեռքերին, ինչի հետևանքով կինը մահացել էր, իսկ մարդասպանը` փախել ոչ միայն դեպքի վայրից, այլև՝ հանրապետությունից:

Իրավապահներին, սակայն, հաջողվեց պարզել, որ սպանությունը կատարողը Երևանի բնակիչ Ռ.Հովհաննիսյանն էր: Նրան առաջադրվեց մեղադրանք և հայտարարվեց հետախուզում:

2014թ. մարտին Ռ.Հովհաննիսյանը հայտնաբերվեց, վերադարձվեց Հայաստան և կալանավորվեց:

Դրանից հետո արդեն վերսկսված նախաքննության ընթացքում ի հայտ եկան նոր հանգամանքներ:

Նախաքննությանը մոտ կանգնած աղբուներից «Փաստինֆո»-ին հայտնի է դարձել, որ դեպքից հետո սպանվածի հարազատներն իրավապահներին հայտնել են, որ սպանության օրն իրենց տնից նաև գողություն է կատարվել: Մարդասպանը բնակարանից հափշտակել է 80.000 ՀՀ դրամ, 2 ոսկյա վզնոց, 1 ոսկյա շղթա և 2 ոսկյա մատանի:

Այս նոր հանգամանքների արդյունքում Ռ.Հովհաննիսյանին առաջադրվել է նոր մեղադրանք` ՀՀ քրեական օրենսգրքի 104-րդ հոդվածի 2-րդ մասի 8-րդ կետով, այն է`շահադիտական դրդումներով, ծանրացնող հանգամանքով զուգորդված սպանություն կատարելու համար:

Ստացվում է, որ երիտասարդ կնոջը դաժանաբար սպանելու մոտիվացիան նրա ոսկեղենին ու տանը պահվող 80 000 դրամին տիրանալն է եղել: Ի դեպ, մեր ունեցած տեղեկություններով, Ռոբերտ Հովհաննիսյանն առաջադրված այս մեղադրանքում իրեն միայն մասնակի է մեղավոր ճանաչում և հրաժարվում է ցուցմունք տալ:

Հետաքրքրական մեկ այլ հանգամանք ևս. 2014թ. մարտին՝ կալանավորումից հետո, Ռ.Հովհաննիսյանը ենթարկվել էր դատահոգեբուժական և դատահոգեբանական համալիր փորձաքննությունների: Դրանց արդյունքում Ռոբերտ Հովհաննիսյանի մոտ որևէ խրոնիկական հիվանդություն չէր հայտնաբերվել, նա ճանաչվել էր հոգեպես առողջ, այսինքն`մեղսունակ:

Սակայն ինչ-ինչ հանգամանքներից ելնելով՝ նախաքննական մարմինը կասկածել է  փորձաքննությունների այս եզրակացության իսկությանը, և հուլիսին որոշում է կայացվել՝ կրկնակի դատահոգեբանական հանձնաժողովային փորձաքննություն իրականացնելու մասին: Ինչպես մեզ հայտնի դարձավ, այս նոր փորձաքննության եզրակացությունը դեռևս չի ստացվել:

Նշենք, որ Ռ.Հովհաննիսյանի նկատմամբ ընտրված խափանման միջոց կալանքի ժամկետը երկարացվել է ևս 2 ամսով և ավարտվում է նոյեմբերի 7-ին:

Իսկ նախաքննության ժամկետի ավարտը հոկտեմբերի 8-ն է: Փաստորեն մի քանի օրից այս դաժան սպանության գործի նախաքննությունը պետք է որ հասնի իր տրամաբանական հանգուցալուծմանը: