Փաստ ինֆո

Շանթ Հարությունյանի գործով ամբաստանյալներ Արմեն Հովհաննիսյանի ու Տիգրան Պետրոսյանի պաշտպան Արա Զաքարյանն այսօր իր պաշտպանական ճառն ուղղեց ՀՀ նախագահ Սերժ Սարգսյանին՝ հաշվի առնելով, որ երկրի ղեկավարը վերջերս իրավական գնահատականներ է տվել նոյեմբերի 5-ի դեպքերին: 
 
Ըստ պաշտպանի՝ եթե երկրի ղեկավարին ապակողմնորոշել են այն աստիճան, որ նա այլևս հետ չի կանգնի իր գնահատականից ու չի փոխի այն, ապա՝ պաշտպանը տեսակետ հայտնեց՝ այդ դեպքում «ո՞վ կհամարձակվի երկրի առաջին դեմքի տեսակետին հակառակ դատավճիռ կայացնել»:  

Արա Զաքարյանը խնդրեց երկրի ղեկավարին թույլ չտալ, որպեսզի մեղավոր ճանաչվեն, դատապարտվեն, ապա պատիժը կրեն անձինք, ում արարքներն օրենքի ու իրավունքի առումով հանցագործություն չեն համարվում: Ռեպրեսիվ միջոցներ գործադրելը կհանգեցնի հակառակ ազդեցությանը, այն է՝ մարդկանց համախմբմանը: 

«Երրորդ իշխանությյանը կայանալու հնարավորություն տվեք»,- նշեց Արա Զաքարյանը՝ դիմելով երկրի ղեկավարին:

Պաշտպանի իրավական վերլուծության համաձայն՝ ոստիկանները ոչ իրավաչափ են գործել. խաղաղ երթի անօրինական լինելու դեպքում նրանք պարտավոր էին զգուշացնել երթի ղեկավարին, որպեսզի նա էլ զգուշացնի երթի մասնակիցներին, անհետևանք մնալու դեպքում ոստիկանները նախքան երթը ցրելը կամ դադարեցնելը պարտավոր էին առնվազն երկու անգամ բարձրախոսով իրազեկել, որ հավաքն անօրինական է:

Հիշյալ՝ օրենքի պահանջներին համապատասխան գործողությունները ոստիկանների կողմից չեն արվել, նշեց պաշտպանը և հավելեց, որ ոստիկանները չեն դիմել որևէ մեկին՝ զգուշացնելով դուրս չգալ փողոցի երթրեկելի մաս՝ դա հիմնավորվում է նաև գործում առկա տեսանյութով: Ավելին, երևում է, որ մոտ 10 անձ, այդ թվում՝ լրագրողներ, այդ ժամանակ գտնվել են փողոցի երթևեկելի մասում:  

Ըստ պաշտպանի՝ խաղաղ երթը դադարեցվել է Հավաքների մասին օրենքի ու Մարդու իրավունքների եվրոպական կոնվենցիայի պահանջների կոպիտ խախտմամբ:
 
Արա Զաքարյանն ընդգծեց, որ ոչ մի կերպ հիշյալ դեպքերը չեն կարող որակվել որպես խուլիգանություն. ոստիկանները չեն կարող համարվել խուլիգանության օբյեկտ՝ հասարակություն:

«Եթե չկան խուլիգանական մղումեր, գործողությունը չի կարող գնահատվել որպես խուլիգանություն»,- ասաց պաշտպանը:

Ամբաստանյալներ Սևակ Մնացականյանի ու Ավետիս Ավետիսյանի պաշտպան Կարեն Քալանթարյանի պաշտպանական ճառը մերթ ընդ մերթ պաշտպանյալների կողմից ընդմիջվում էր՝ ըստ ամենայնի ամբաստանյալները անհամաձայնություն էին հայտնում ու դժգոհում, որ իրենց պաշտպանը, իրենց կարծիքով, քաղաքական հետապնդման գործով քաղաքական դիրքորոշում չի հայտնում: Արդյունքում՝ պաշտպանը սահուն անցում կատարեց ճառի եզրափակիչ հատվածին՝ միջնորդելով իր պաշտպանյալներին արդարացնել ու կայացնել արդարացման դատավճիռ: 
 
Նույնպիսի միջնորդություն արեց նաև ամբաստանյալ Հայկ Հարությունյանի պաշտպան Ռուբեն Սարգսյանը՝ միաժամանակ միջնորդելով նաև, որ, այնուամենայնիվ, մեղավոր ճանաչվելու դեպքում պատիժը պայմանականորեն չկիրառվի:

Այսօրվա դատական նիստում գործում որպես ամբաստանյալ Ալեք Պողոսյանի պաշտպան ներգրավվեց հանրային պաշտպան Էդուարդ Աղաջանյանը, ով ամբաստանյալի պաշտպանությունը իրականացրել էր նաև նախաքննության ընթացքում:

Ամբաստանյալը հայտարարեց, որ եթե ճառում իրավական  վերլուծություն է արվելու «քաղաքական հետապնդման» գործով, ապա ինքը հրաժարվում է: Եթե հետագայում պետք լինի, նորից կներգրավի հանրային պաշտպան: Դատարանը չընդունեց պաշտպանից այս հրաժարումը՝ արդարադատության շահերից ելնելով և պաշտպանին ժամանակ տրամադրեց՝ ճառը նախապատրաստելու համար:

Հաջորդ դատական նիստում ճառով հանդես կգա Է.Աղաջանյանը, ապա ճառերով հանդես կգան նաև ամբաստանյալները, ըստ ամենայնի՝ նույն օրն էլ ռեպլիկներն ու ամբաստանյալների վերջին խոսքը լսելուց հետո դատարանը կհեռանա խորհրդակցական սենյակ՝ դատավճիռ կայացնելու: