Փաստ ինֆո

«Մենք ոչ մի ցնցման կողմնակից չենք: Իսկապես մեր խնդիրը Սերժ Սարգսյանը չէ, մեր խնդիրն այս երկրի հանգիստ, կանխատեսելի վիճակն է»,-այսօր ճեպազրույցում ասաց Ազգային ժողովի «Հայ ազգային կոնգրես» խմբակցության քարտուղար Արամ Մանուկյանը` ընդգծելով, որ տարածաշրջանում անընդհատ բոցեր են, կրակներ են, անընդհատ սթրեսներ են»:

«Վախենալու է այդ ամենը` ինչ է կատարվում Սիրիայում, Իրաքում, Ուկրաինայում: Սրանք վախեցնող են, մեզ համար չի»,- ընդգծեց նա` հավելելով, որ ցանկալի տարբերակն իշխանությունների կողմից խոհեմություն դրսևորելն է`հնարավորություն տալով հանգիստ ընտրություններ անցկացնել:

«Ամենևին մեջս չարություն չկա, ամենևին վրեժի զգացողություն չկա»,- վստահեցրեց ընդդիմադիր պատգամավորը` նկատելով, որ շարժումները չեն կարող դրական արդյունքի հասնել, եթե կան «վրեժը, ցասումը, ջարդելը»:

Նա ընդգծեց, որ նման կերպ իշխանության գալն ամենևին իրենց նպատակը չէ: «Եվ փառք Աստծո, որ այդպես են տրամադրված մեր բոլոր այն քաղաքական ուժերը, որոնք այսօր փորձում են հրապարակով գալ իշխանության»,- նշեց Ա.Մանուկյանը: