Փաստ ինֆո

«Երբ դու 10-15 օրվա մեջ պիտի հանրահավաքներ անես տարբեր մարզերում, քաղաքներում, և, բնականաբար, ամեն տեղ նույն բաներն ասես, այսօրվա մեր իրազեկման պայմաններում, ի վերջո, ինքդ էլ ես հոգնում, տեսնում ես, որ ավելին չես կարող ասել` տարբեր պատճառներով»,- այսօրվա ճեպազրույցում ասաց Ազգային ժողովի ՀՅԴ խմբակցության քարտուղար Աղվան Վարդանյանը` անդրադառնալով եռյակի մարզային հանրահավաքներին:

Ըստ նրա` եթե ինքը հանրահավաքներին մասնակցելու լիներ, կառաջարկեր դրանք երկու-երեք տեղում անել, այլապես վախենում է, որ «մաշվում է»: Նաև հավելեց, թե այդ հանդիպումներում էներգետիկա չի տեսնում:

Միևնույն ժամանակ նա նկատեց, որ թերևս հոկտեմբերի 10-ին Երևանում կայանալիք հանրահավաքում ավելի հստակ կերևա պատկերը: «Ես միայն ուրախ կլինեմ, եթե մեր գործընկերները կարողանան իսկապես հաջողել, և մարդաշատ հանրահավաք լինի»,- ասաց նա:

Ինչ վերաբերում է քառյակի 12 կետերին կառավարության պատասխանին, ապա Ա.Վարդանյանը դիրքորոշում չունի:

«Ինչու չունեմ, որովհետև կառավարությունը շատ էր ուզում, որ ինքը պատասխաներ, բայց իր առաջաբանի և պատասխանի ոճը, որ ես կարդացի, զգացողություններս բացասական էին խիստ: Ասել, որ պատասխանում են, բայց փորձել այնպես պատասխանել, որ ձեր հարցապնդումները մեր համար ոչ մի բան են, մենք ամեն ինչ էլ անում ենք, կառավարության նույն ոճի մեջ է: Փորձել ասել` համագործակցում ենք, բայց կիսալուծումներ տալով անցնել առաջ, ժամանակ շահել, անցնել առաջ»,- ասաց Ա.Վարդանյանը՝ ընդգծելով, որ դրա համար էլ ինքն ասում է, որ կառավարության պատասխանը եղած չեղած մի հաշիվ է: «Մենք գիտենք, որ 12 կետերը 99 տոկոկոսով կատարված չեն»,- ընդգծեց նա:

Լուսանկարը՝ Ֆոտոլուրի