Փաստ ինֆո

Սյունիքի մարզպետի առանձնատան մոտ զինված միջադեպի գործով միակ ամբաստանյալ Արտակ Բուղաղյանի պաշտպան Հայկ Ալումյանն այսօր ինքնաբացարկի միջնորդություն ներկայացրեց գործով նախագահող դատավոր Նապոլեոն Օհանյանին:

Հայկ Ալումյանն արձանագրեց, որ դատավորը բնակվում ու աշխատում է Սյունիքի մարզում, որի մարզպետ է նշանակվել գործով տուժող Լորետա Բարսեղյանի ամուսինը:

Ի դեպ, Հայկ Ալումյանն ընդգծեց, որ տուժող բառն ասում է չակերտների մեջ: Ըստ պաշտպանի՝ բացառված չէ, որ դատավորն ունենա, օրինակ, շինարարության թույլտվություն ստանալու կամ նրա ընտանիքի անդամները մարզային ենթակայության որևէ հիմնարկում՝ մանկապարտեզ, դպրոց, հիվանդանոց և այլն, աշխատանքի անցնելու խնդիր ունենան, և այդպիսով հայտնվեն տուժողի ամուսնու իրավասության ներքո:

Այս հանգամանքն առնվազն անկողմակալ դիտորդի մոտ կարող են կասկածներ առաջացնել դատարանի անկողմնակալության հարցում:

Ինքնաբացարկն ընդունելու համար Հայկ Ալումյանի ներկայացրած նոր հիմքը Սուրիկ Խաչատրյանի՝ մարզպետի պաշտոնում վերանշանակվելու առիթով նրան մարզպետարանի աշխատակիցներին ներկայացնելու արարողությանը մարզպետի   հայտարարությունն է:

Ըստ այդմ, մարզպետը շնորհակալություն է հայտնել բոլորից և նշել, որ չորս սյուները՝ կայազորը, Ազգային անվտանգության ծառայությունը,  դատախազը,  դատարանի նախագահն ու ոստիկանապետը, այսուհետ ևս միասին կհամագործակցեն ի շահ Սյունիքի մարզի ու պետության:

Հայկ Ալումյանն ընդգծեց, որ դատարան ասելով՝ մարզպետը նկատի է ունեցել համակարգը, որի մաս է կազմում նաև  նախագահող դատավորը:

Միայն այն, որ մարզպետի որդուն՝ Տիգրան Խաչատրյանին, ոստիկանությունը չի կարողանում բերման ենթարկել դատարան, համագործակցության արգասիքներից մեկն է:

Տուժող կողմի ներկայացուցիչ Ռուբեն Սահակյանը հայտարարեց, որ Տիգրան Խաչատրյանը ճանապարհին է և կներկայանա դատարան:  

Մեղադրող Կարեն Հարությունյանը չհամաձայնեց դատարանի վրա մարզպետարանի ու մարզպետի հնարավոր ներգործության մտքի հետ՝ ընդգծելով, որ դատարանն առաջնորդվում է օրենսդրությամբ, իսկ անկողմակալ դիտորդի մոտ դատարանի անկողմանակալության կասկածների վերաբերյալ հարցը թողեց դատարանի հայեցողությանը: Նույնպիսի դիրքորոշում հայտնեց նաև Ռուբեն Սահակյանը:

Դատարանը հեռացավ խորհրդակցական սենյակ՝ միջնորդության վերաբերյալ որոշում կայացնելու: