Փաստ ինֆո

Ազգային ժողովի ընթացիկ նստաշրջանի Էթիկայի հանձնաժողովի կազմը հաստատված է: Այն ղեկավարելու է ՀՀԿ խմբակցության անդամ Արփինե Հովհաննիսյանը, ով հանձնաժողովի կազմում և ղեկավարի պաշտոնում փոխարինել է նույն խմբակցության անդամ Հովհաննես Սահակյանին:

Վերջինս, ով նաև Պետական-իրավական հարցերի մշտական հանձնաժողովի նախագահն է, ինչպես «Փաստինֆո»-ն ավելի վաղ տեղեկացրել էր, հրաժարվել է Էթիկայի հանձնաժողովում ընդգրկվելուց՝ մշտական հանձնաժողովում մի շարք կարևորագույն նախագծերի վրա ծանրաբեռնված աշխատանքի պատճառով:

Էթիկայի հանձնաժողովի ներկայիս կազմում ընդգրկված է 6 պատգամավոր՝ ի տարբերություն նախորդ կազմի 5 անդամի:

Այս փոփոխությունը պայմանավորված է «Օրինաց երկիր» խմբակցության ընդդիմադիր դառնալու հետ: ԱԺ կանոնակարգ-օրենքի համաձայն՝ հանձնաժողովի կազմում ընդդիմադիր՝ «ՀՅԴ», «Ժառանգություն» և «Օրինաց երկիր», և ոչ ընդդիմադիր՝  «ՀՀԿ», խմբակցությունները պետք է ունենան հավասար թվով ներկայացուցիչներ, ևս մեկը պետք է ներկայացնի այլընտրանք համարվող «Բարգավաճ Հայաստան»-ը:

Հիշեցնենք, որ ընդդիմադիր «Հայ ազգային կոնգրես»-ն այս նստաշրջանում ևս հրաժարվել է հանձնաժողովի աշխատանքներին մասնակցելուց՝ ի նշան հանձնաժողովի ձևավորման կարգի փոփոխության հետ անհամաձայնության:

Ձևավորման այս կարգի համաձայն՝ ՀՀԿ-ն կարող էր ունենալ երեք անդամ, սակայն առաջադրել է երկուսին՝ Ա.Հովհաննիսյանին և Սուքիաս Ավետիսյանին:

Ի տարբերություն ՀՀԿ-ի, մյուս 4 խմբակցությունների ներկայացուցիչները հանձնաժողովում մնացել են անփոփոխ. «Բարգավաճ Հայաստան»-ը ներկայացնում է Վահան Բաբայանը, «Օրինաց երկիր»-ը՝ Հովհաննես Մարգարյանը, «Ժառանգություն»-ը՝ Թևան Պողոսյանը, «Հայ Յեղափոխական Դաշնակցություն»-ը՝ Աղվան Վարդանյանը: