Փաստ ինֆո

Դատարանն այսօր մերժեց Սյունիքի մարզպետի առանձնատան մոտ զինված միջադեպի գործով միակ ամբաստանյալ Արտակ Բուղաղյանի պաշտպան Հայկ Ալումյանի միջնորդությունը՝ դատարանի ինքնաբացարկ հայտնելու մասին:

Ըստ պաշտպանի՝ նախագահող դատավոր Նապոլեոն Օհանյանը բնակվում ու աշխատում է Սյունիքի մարզում, որի մարզպետ է նշանակվել գործով տուժող Լորետա Բարսեղյանի ամուսինը:

Ուստի՝ բացառված չէ, որ դատավորն ունենա, օրինակ, շինարարության թույլտվություն ստանալու կամ նրա ընտանիքի անդամները մարզային ենթակայության որևէ հիմնարկում՝ մանկապարտեզ, դպրոց, հիվանդանոց և այլն, աշխատանքի անցնելու խնդիր ունենան, և այդպիսով հայտնվեն տուժողի ամուսնու իրավասության ներքո: Այս հանգամանքը առնվազն անկախ դիտորդի մոտ կարող են կասկածներ առաջացնել դատարանի անկողմնակալության ու անաչառության հարցում:

Ինքնաբացարկն ընդունելու համար Հայկ Ալումյանի ներկայացրած նոր հիմքը Սուրիկ Խաչատրյանի՝ մարզպետի պաշտոնում վերանշանակվելու առիթով նրան մարզպետարանի աշխատակիցներին ներկայացնելու արարողությանը մարզպետի հայտարարությունն է:

Ըստ այդմ, մարզպետը շնորհակալություն է հայտնել բոլորից և նշել, որ չորս սյուները՝ կայազորը, Ազգային անվտանգության ծառայությունը, դատախազը, դատարանի նախագահն ու ոստիկանապետն այսուհետ ևս միասին կհամագործակցեն՝ ի շահ Սյունիքի մարզի ու պետության:

Հայկ Ալումյանն ընդգծեց, որ դատարան ասելով՝ մարզպետը նկատի է ունեցել համակարգը, որի մաս է կազմում նաև նախագահող դատավորը: Միայն այն, որ մարզպետի որդուն՝ Տիգրան Խաչատրյանին, ոստիկանությունը չի կարողանում բերման ենթարկել դատարան, համագործակցության արգասիքներից  մեկն է:

Դատարանի որոշման հրապարակումից հետո Հայկ Ալումյանը տարակուսանք հայտնեց որոշման մեջ առկա այն պնդման կապակցությամբ, թե «բացարկը հիմնավորող որևէ ապացույց չի ներկայացվել»:

Պաշտպանն ընդգծեց, որ ինքն առաջարկում էր ներկայացնել մարզպետի վերոհիշյալ հայտարարության տեսագրությունը, սակայն դատարանն այն չընդունեց՝ նշելով, որ ինքը մամուլից ծանոթ է դրան:

Պաշտպանն առարկեց դատարանի գործողությունների դեմ: Այն հանգամանքը, ըստ Հայկ Ալումյանի, որ մարզպետի որդուն՝ գործով վկա Տիգրան Խաչատրյանին, չեն կարողանում բերման ենթարկել դատարան, իսկ մարզպետի մյուս որդու՝ Տրդատի ներկայության մասին նիստերի քարտուղարը հայտարարում է՝ հիմնվելով սոսկ տուժող Լորետա Բարսեղյանի ասածի վրա, վկայում է այն մասին, որ դատարանը չի կարող անկողմնակալ ու անաչառ լինել այս գործով, քիչ թե շատ արդարացի ու օբյեկտիվ քննություն կատարել:

Հայկ Ալումյանը հայտարարեց նաև, որ այս գործով իր մասնագիտական պարտականությունները կատարելիս պաշտպանն ինքը նույնպես  իրեն ապահով վիճակում չի զգում, հայտնի են բազմաթիվ միջադեպեր մարզպետի մասնակցությամբ:

«Ես այս դատավարությունում չեմ կարող պատշաճ որակի ծառայություններ մատուցել»,- ասաց Հայկ Ալումյանը՝ ընդգծելով, որ ինքը ստիպված է լքել դատավարության նիստերի դահլիճը, «եթե սա կարելի է դատավարություն համարել»:

Դատարանն իր հերթին պարզաբանեց, որ անհրաժեշտ միջոցներ ձեռնարկել է Տիգրան Խաչատրյանի ներկայությունն ապահովելու համար. կայացվել է բերման ենթարկելու որոշում, ապա հանձնարարվել է ոստիկաններին ապահովել դատարանի որոշման կատարումը:

Դատարանը նաև տեղում՝ իր նիստերի քարտուղարից, պարզեց, որ իրոք վերջինս Տրդատ Խաչատրյանի ներկայության մասին տեղեկացել է նրա մորից՝ Լորետա Բարսեղյանից:

Հայկ Ալումյանը, այնուամենայնիվ,  լքեց նիստերի դահլիճը, դատարանն էլ հայտարարեց, որ հեռանում է խորհրդակցական սենյակ՝ դատավարությունից պաշտպանին հեռացնելու հարցը քննելու համար:

Մեղադրանքի կողմում հանդես եկող փաստաբան Ռուբեն Սահակյանն իր զորակցությունը հայտնեց Հայկ Ալումյանին՝ հայտարարելով, որ  դատարանը տվյալ դեպքում չի կարող կայացնել դատավարությունից պաշտպանին հեռացնելու որոշում, դատական նիստը պետք է  հետաձգվի:

Դատական նիստն ընդմիջվեց:

Դատարանը՝ վերադառնալով խորհրդակցական սենյակից, հրապարակեց որոշումը՝ դատական նիստը հետաձգելու մասին, հաջորդ նիստը տեղի կունենա հոկտեմբերի 7-ին: