Փաստ ինֆո

Քաղաքացի Կարեն Մամիկոնյանը անօրինական, առանց որևէ հիմքի  7.5 ժամ պահվել է ոստիկանության Աբովյանի բաժնում,  որտեղ  քրեական հետախուզության բաժնի պետ  Երանոսյանն ու ոստիկանության  Կոտայքի բաժնի պետ Մկրտչյանը նրան  վիրավորել ու նսեմացրել են: Քաղաքացին  զրկվել է նվազագույն իրավունքներից, մասնավորապես,  հեռախոսազանգ կատարելու  իրավունքից, նրան չի բացատրվել փաստաբան ունենալու իրավունքը:

Ինչպես «Փաստինֆո»-ի թղթակցին հայտնեց  քաղաքացու ներկայացուցիչ, փաստաբան  Ինեսսա Պետրոսյանը,  քաղաքացուն անօրինական ոստիկանության բաժնում պահելու ու ճնշում գործադրելու պատճառն է եղել նրան համոզել, ստիպել «խոստովանել», որ  նրա  ձեռքի   վնասվածքը  վիճաբանության ընթացքում ծեծի ենթարկվելու հետևանք է: Մինչդեռ  քաղաքացին նորից ու նորից հայտարարում էր, որ ձեռքը կոտրել է իր տան նկուղում, որտեղ ցանկանում էր տեղավորել իր մանկահասակ երեխայի մանկասայլակը:

ՔՀԲ պետ Երանոսյանը,  ըստ քաղաքացու, իրեն շատ անվայել կերպ էր վերաբերվում, վիրավորական բառեր ասում, սպառնում՝«հենց հիմա կկարգադրեմ, որ կնոջդ և երեխայիդ բերեն բաժին»:  Հետագայում քաղաքացին իմացել է, որ իրոք ոստիկանության աշխատակիցները գնացել են իր  բնակարան և ստիպել կնոջը թողնել հիվանդ,  մանկահասակ երեխային և 9 ամյա երեխայի հետ ներկայանալ բաժին, ինչին կինը չի համաձայնվել՝ չնայած նրանց  բազմաթիվ պնդումներին:

Ճնշումները շարունակվել են  նաև ոստիկանության  Կոտայքի բաժնի պետ  Ա.Մկրտչյանի աշխատասենյակում՝ անձամբ իր կողմից:

Քաղաքացին փաստացի  ժամը 13.00-ից գտնվել  է անազատության մեջ, սակայն  միայն ժամը 16.30-ի սահմաններում  են կազմվել  փաստաթղթեր և  բացատրություն վերցվել, որում քաղաքացին պնդել է, որ վնասվածքը իր տան նկուղում է ստացել:

Քաղաքացու  հարազատները՝  տեսնելով,  որ  Կարենից  որևէ տեղեկություն չունեն,  Երևանից հրավիրել են փաստաբան  Ինեսսա Պետրոսյանին, նրան հաջողվել է բարձրանալ քաղաքացու մոտ ու  իրավաբանական օգնություն ցուցաբերել  նրան   ժամը 18.30-ի սահմաններում, այն էլ՝  Մարդու իրավունքների պաշտպանի գրասենյակի արագ   արձագանքման խմբին ահազանգելուց   ու   ՄԻՊ գրասենյակի միջամտությունից հետո:

Փաստաբան Ինեսսա Պետրոսյանի ներկայանալուց հետո էլ   քաղաքացուն  թույլ չեն տվել  դուրս գալ ոստիկանության շենքից և անօրինական պահել են այնտեղ, ապա ներկայացրել են  որոշում՝ դատաբժշկական փորձաքննություն նշանակելու մասին, որտեղ նշված է եղել, որ քաղաքացուն  բերման են ենթարկել ժամը 16.45-ին:  Երբ վերջինս  ցանկացել է  նշել, որ դա սխալ է, որ  ինքն է ներկայացել ժամը 13-ի սահմաններում, ոստիկանության բաժնի պետ Ա. Մկրտչյանը անմիջապես եկել է  հետաքննիչի աշխատասենյակ, վերցրել  այդ արձանագրությունը՝ թույլ չտալով  այդ մասին նշում կատարվի  արձանագրության մեջ:  Ի վերջո,  քաղաքացին  ազատ է  արձակվել  ժամը 20.30-ին:

Քաղաքացին ու նրա ներկայացուցիչ Ինեսսա Պետրոսյանը  դիմել են Մարդու իրավունքների  պաշտպան Կարեն Անդրեասյանին,  ՀՀ գլխավոր դատախազ Գևորգ Կոստանյանին ու ոստիկանապետ Վլադիմիր Գասպարյանին՝  խնդրելով միջոցներ ձեռնարկել, որպեսզի պատասխանատվության ենթարկվի   քաղաքացուն անօրինական 7.5 ժամ պահած, վիրավորած, նսեմացրած, ինչպես նաև նրան  նվազագույն իրավունքներից զրկած անձը, իրավական գնահատականներ տրվեն  ՔՀԲ պետ՝ Երանոսյանի և ոստիկանության Աբովյանի բաժնի պետ Ա. Մկրտչյանի կողմից իրեն  վիրավորելու, նսեմացնելու և այլ անօրինական գործողություններ կատարելու համար:

Ոստիկանության թեժ գծին դիմելուց  հետո քաղաքացուն ու փաստաբանին  հրավիրել են ոստիկանության ներքին անվտանգություն վարչություն, որտեղ  ծառայողական քննություն է կատարվում: