Փաստ ինֆո

2011թ. բանակում զինծառայող Հայկ Խաչատրյանի՝ ջրծաղիկից մահանալու գործով այսօրվա դատական նիստում դատարանը բավարարեց մեղադրողի միջնորդությունը՝ դատարան հրավիրել և հարցաքննել կրկնակի հանձնաժողովային դատաբժշկական փորձաքննությանը մասնակցած 4 անձանց:

Ըստ մեղադրողի կրկնակի հանձնաժողովային դատաբժշկական փորձաքննության եզրակացությամբ՝ որոշակի հարցերի պատասխանները տրվել են թերի, ուստի՝ մեղադրողը միջնորդեց դատարան հրավիրել հանձնաժողովային փորձագետների՝ 2 վարակաբանի և 2 վիրաբույժի:
Պաշտպանական կողմն առարկեց մեղադրողի միջնորդության դեմ:

Ամբաստանյալ Մինաս Մկրտչյանի պաշտպան Վարդուհի Էլբակյանը նշեց, որ ինչպես նախաքննության, այնպես էլ դատաքննության փուլում նշանակվել են մի շարք փորձաքննություններ և սույն փորձաքննության եզրակացությունը համադրելով մյուս 2 փորձաքննությունների եզրակացությունների հետ՝ պաշտպանական կողմը գտնում է, որ որևէ շեղում չի եղել նախկինում տրված եզրակացություններից և բոլոր այն հարցերը, որոնք առաջ է քաշում մեղադրողը, այդ հարցերի պատասխանները տրվել են և նորից փորձագետներին հրավիրելը և հարցաքննելը գործի շահերից և ողջամտության ժամկետներից չի բխում:

Պաշտպանը հավելեց, որ դատարանում հարցաքննված փորձագետ Մելանյա Շմավոնյանը նշել է, որ որևէ կերպ հնարավոր չի եղել կանխել այդ հիվանդության ելքը:

Ավելին, ամբաստանյալների գործողությունները որևէ պատճառահետևանքային կապի մեջ չեն գտնվում զինծառայող Հայկ Խաչատրյանի մահվան հետ:

Ըստ ամբաստանյալ Միքայել Միքայելյանի պաշտպան Լևոն Պողոսյանի էլ մեղադրողը պետք է մեկ միջնորդություն կատարեր և հրաժարվեր մեղադրանքից: Պաշտպանը գտնում է, որ մեղադրողը կաշկանդված է և չի կարողանում ինքնուրույն ներկայացնել այդ մեղադրանքից հրաժարվելու միջնորդությունը:

Ի պատասխան պաշտպանի հայտարարությանը՝ մեղադրողը նշեց, որ բացարձակապես կաշկանդված չէ և ենթարկվում է միայն օրենքին և օրենքի սահմաններից դուրս չի գալիս:

Այնուամենայնիվ դատարանը բավարարեց մեղադրողի միջնորդությունը: Հիշեցնենք, որ փորձագետներին առաջադրվել էին շուրջ 42 հարցեր:

Մասնավորապես, ըստ փորձագետների եզրակացության՝ Ջրծաղիկի ախտորոշվելուց հետո տեղափոխման համար անհրաժեշտ բոլոր  միջոցառումները կազմակերպվել են, սակայն նոր աշխատանիշներ ի հայտ գալուց հետո՝ սուր ցավեր որովայնում, որոշվել է թողնել հիվանդին հոսպիտալում՝ վիրաբույժի հսկողության տակ, քանի որ հոսպիտալը հանդիսանում է բազմապրոֆիլ հիվանդանոցային համալիր, իսկ «Նորքի ինֆեկցիոն հիվանդանոցը»՝ մոնոպրոֆիլ:

Հարցին, թե մահացած զինծառայող Հայկ Խաչատրյանին «Նորք» մասնագիտացված կլինիկա մեկ օր ժամկետով տեղափոխելը կասեցնելը,  նպաստե՞լ է հիվանդության զարգացմանը և հիվանդի մահվանը, եթե՝ այո, ապա՝ ինչո՞վ, փորձագետները պատասխանել են, որ ուշացում չի եղել, հիվանդը գտնվել է հսկողության տակ, բազմապրոֆիլ հիվանդանոցում:

Հնարավո՞ր էր՝ կոնկրետ դեպքում առավել վաղ կանխատեսել, ախտորոշել և կանխել ջրծաղիկի վիսցերալ ձևի զարգացումը հարցին էլ տրվել է պատասխան, որ հնարավոր չէր կանխատեսել, ախտորոշել և կանխել ջրծաղիկի վիսցերալ ձևի զարգացումը, քանի որ հիվանդությունն ընթացել է կայծակնային:

Հիվանդի հոսպիտալում պահվելու դեպքում վիրաբուժական հետազոտության հետ համակցված հակավիրուսային և դեզինտոքսիկացիոն բուժում պե՞տք է շարունակվեր թե՝ ոչ և ի՞նչ ծավալով, ու՞մ պարտականության մեջ էր մտնում նշված թերապիայի կազմակերպումը, վիրաբուժական հետազոտության ընթացքում ինչպիսի՞ բացթողումներ են թույլ տվել բաժանմունքի վարիչ Մինաս Մկրտչյանը, հոսպիտալի պետ Միքայել Միքայելյանը և վիրաբույժները, հարցին էլ փորձագետները պատասխանել են, որ ըստ հիվանդության պատմության տվյալների՝ ջրծաղիկի բուժման համար սպեցիֆիկ հակավիրուսային բուժման կարիք չի եղել, իսկ դեզինտոքսիկացիոն բուժում հիվանդն ստացել է:

Մինաս Մկրտչյանի և Միքայել Միքայելյանի կողմից բացթողումներ չկան:

Եթե նույնիսկ մինչև 29.12.2011թ. Հայկ Խաչատրյանը ստանար հակավիրուսային դեղորայքի ներարկում, հնարավոր չէր լինի կանխել ջրծաղիկի վիսցերալ կայծակնային ձևի զարգացումը: Մահվան ելքը ջրծաղիկի վիսցերալ ձևի ժամանակ անխուսափելի է:

Նշենք նաև, որ այսօրվա դատական նիստին չէին ներկայացել տուժողի իրավահաջորդը և նրա ներկայացուցիչը: Դատական հաջորդ նիստը տեղի կունենա հոկտեմբերի 21-ին: