Փաստ ինֆո

Ազգային ժողովի բոլոր խմբակցությունների ներկայացուցիչներն այսօր՝ մինչև ԱԺ-կառավարություն հարցուպատասխանին նվիրված նիստի սկիզբը, կհանդիպեն կառավարության համապատասխան պատասխանատուների հետ:

Նպատակն առևտրի ոլորտի ներկայացուցիչների բարձրացրած հարցերի վերաբերյալ սկզբունքային մոտեցումներ հստակեցնելն է, որոնց աշխատանքային կարգով լուծումներ կտրվեն հետագայում:

Այս մասին պայմանավորվածությւոն է ձեռք բերվել Ազգային ժողովի բոլոր խմբակցությունների մասնակցությամբ ԱԺ նախագահ Գալուստ Սահակյանի մոտ հրավիրված խորհրդակցության ժամանակ:

Ինչպես լրագրողներին վստահեցրեց խորհրդակցությանը մասնակցած ԲՀԿ խմբակցության անդամ Միքայել Մելքումյանը, բոլոր քաղաքական ուժերն անխտիր հայտնեցին իրենց մտահոգությունը` ընդունելով, որ ակնհայտ խնդիր կա այսօրվանից ուժի մեջ մտած «Շրջանառության հարկի մասին» օրենքում փոփոխությունների կիրառման, մասնավորապես, շրջանառության պարտադիր փաստաթղթավորման հետ կապված:

Նշվել է նաև, որ իրոք խնդիրը լուծում է պահանջում: Թե ինչպիսին կլինի այն, ցույց կտա կառավարության հետ հանդիպումը:
«Այս հարցում քաղաքական ուժերը որևէ կուսակցական դիվիդենտ, շահաբաժին չեն ակնկալում: Այսօր Հայաստանում առևտրի ոլորտում աշխատում է 37 հազար մարդ, և մենք հակված ենք ժամը 16-ին ԱԺ-ի մոտ հավաքվող նրանց ներկայացուցիչներին հստակ պատասխան տալ»,-վստահեցրեց Մ.Մելքումյանը` հավելելով, որ իրենք հրատապ լուծումների կողմանկից են:

ՀԱԿ խմբակցության քարտուղար Արամ Մանուկյանն էլ նկատեց, որ «կառավարությունն այս խնդրի դեմ կողմն է», և այն փաստարկները, որ կառավարության ներկայացուցները բերում են, վստահաբար, բերելու են նաև ԱԺ նիստում` հարցուպատասխանի ժամանակ:

Ա.Մանուկյանը հայտնեց նաև, որ ԱԺ նախագահի մոտ տեղի ունեցած խորհրդակցության ժամանակ իրենք ներկայացրել են, որ այս հարցը կարող է «լուրջ քաղաքական զարգացումներ ունենալ, քանի որ Գյումրիում լուրջ շարժումներ կան, իսկ ժամը 16-ին ԱԺ-ի մոտ ցուցարարները կրկին հավաքվելու են»: