Փաստ ինֆո

Ազգային ժողով-կառավարություն հարցուպատասխանի ժամանակ այսօր ընդդիմադիր պատգամավոր Նիկոլ Փաշինյանն այսօր անդրադարձավ Սուրիկ Խաչատրյանին Սյունիքի մարզպետ վերանշանակելու հարցին` հայտարարելով, որ իր մոտ Ոստիկանությունից ստացված տեղեկանք կա նրա երեք դատվածությունների մասին:

«Բայց փաստորեն ձեր կառավարության հետ աշխատելով՝ ռեցիդիվիստները կարող են վերապատրաստվել: Էսօր բացեցի Սյունիքի մարզպետարանի կայքը, կարդացի նրա պաշտոնական կենսագրությունը: Երեք անգամ դատված մարդը ձեր բարձրաշխարհիկ կառավարության հետ շփվելուց հետո գիտական աշխատանք է ներկայացրել և պատմափիլիսոփայական դոկտորի գիտական աստիճան է ստացել: Հանցագործներին տանում եք կառավարություն, մի քանի տարում ռեցիդիվիստից դոկտոր-պորֆեսորի են վերածվում»,- հայտարարեց Նիկոլ Փաշինյանը:

Ընդդիմադիր պատգամավորի հարցին պատասխանեց վարչապետ Հովիկ Աբրահամյանը` չհամաձայնելով նրա տված որակումներին:

«Սուրիկ Խաչատրյանին ես ինքս եմ առաջարկել մարզպետի պաշտոնում՝ հաշվի առնելով իր տարածքային կառավարման մարմիններում ունեցած փորձը: Համոզված եմ, որ լավ է աշխատելու, նաև հաշվի եմ առել սյունեցիների առաջարկը: Ես բազմաթիվ զանգեր ու առաջարկներ եմ ստացել, հաշվի եմ առել սյունեցիների մեծամասնության կարծիքը»,- ասաց Հովիկ Աբրահամյանը: Ի դեպ, իր խոսքում վարչապետը շփոթվեց և մարզպետի փոխորեն Սուրիկ Խաչատրյանին «վարչապետ» անվանեց:

Այս հարցի վերաբերյալ հայտարարություն արեց նաև «Ժառանգություն» խմբակցության պատգամավոր Զարուհի Փոստանջյանը, ով հայտարարեց, որ գողական աշխարհից տեղեկացել է, որ մարզպետի աթոռի համար մրցույթ է հայտարարվել, բայց Սուրիկ Խաչատրյանը 47 միլիոն դոլար կաշառք է տվել՝ մարզպետի պաշտոնում նշանակվելու համար:

Վարչապետ Հովիկ Աբրահամյանը պատգամավորի հայտարարությունից զայրացավ և ասաց. «Մարզպետին նշանակում է  կառավարությունը, և որևէ մրցույթ չի անցկացվել: Ես ,օգտվելով առիթից, ուզում եմ ասեմ, որ կոռեկտ չեմ համարում, երբ պատգամավորները գնում են միտինգների, հայհոյում երկրի ղեկավարներին: Հարկավոր է նման լկտի պատգամավորներին կարգի հրավիրել: Հերիք է վիրավորել, ես չգիտեմ՝ էդ ի՞նչ նամակ է, ո՞վ է փոխանցել ձեզ, ինչի՞ մասին եք խոսում:

Ես գտնում եմ, որ նման թեմաները պետք է լինեն չափի մեջ: Նման որևէ միջոց չի ազդելու կառավարության գործունեության վրա: Ամեն մարդ ինչ-որ գործողություն է սահմանում, իր չափն ու մակարդակն է ցույց տալիս, տիկին Փոստանջյան, եղեք չափի մեջ: Ուզում եմ բոլոր պատգամավորներին չափի մեջ հրավիրել, եթե չէ, մենք բազմաթիվ չափանիշներով կարող ենք օպոնենտ հանդիսանալ նման պատգամավորներին»: