Փաստ ինֆո

«Քաղաքացիական հասարակության ինստիտուտ» ՀԿ նախագահ Արման Դանիելյանը դիմել է ՀՀ գլխավոր դատախազ Գևորգ Կոստանյանին և Ոստիկանության պետ Վլադիմիր Գասպարյանին` «Ոսկու շուկայի» տնօրեն Վաղարշ Աբրահամյանի արարքին պատշաճ որակում տալու և իրավասության սահմաններում անհրաժեշտ միջոցներ ձեռնարկելու, այդ թվում` քրեական գործ հարուցելու պահանջով։

Հիշեցնենք՝ այսօրվանից ուժի մեջ մտած «Շրջանառության հարկի մասին» ՀՀ նոր օրենքի դեմ բողոքող մանր ու միջին գործարարների շարքերում են նաև այս շուկայի տարածքում առևտուր անող վաճառականները: Դա դուր չէր եկել շուկայի սեփականատիրոջը, և նա սեպտեմբերի 25-ին, շրջելով շուկայի սրահում, իր օգնականներին հրահանգել էր «դուրս շպրտել» այն սեղանները, որոնց առջև այդ պահին առևտրականներ կանգնած չէին։

Իսկ դրանից հետո՝ լրագրողի հետ զրույցում, Վաղարշ Աբրահամյանը չէր հերքել, որ իր գործողությունները կապված են «Շրջանառության հարկի մասին» ՀՀ օրենքում փոփոխությունների դեմ ոսկու շուկայի աշխատակցիների բողոքի ցույցին մասնակցելու հետ։

«Հիմա շրջում ենք շուկայում, որ տեսնենք՝ ով չի էկել, որ կարգի հրավիրենք»,- ասել էր նա՝ հավելելով, որ «միջոցներ են ձեռնարկում», որպեսզի Կառավարության շենքի մոտ բողոքի ակցիային մասնակցողները հետ գան, իսկ չգալու դեպքում սպառնում է «իրենց տեղերը տալ ուրիշին»։

Ոսկու շուկայի սեփականատիրոջ այս պահվածքը «Քաղաքացիական հասարակության ինստիտուտ» ՀԿ-ն որակում է որպես մարդու հիմնարար իրավունքների՝ ազատ արտահայտվելու և հավաքների ազատության իրավունքների, կոպիտ խախտում:

«ՀՀ քրեական օրենսգրքի 163-րդ հոդվածը սահմանում է. «Oրինական հավաքներ անցկացնելուն խոչընդոտելը պատժվում է տուգանքով` նվազագույն աշխատավարձի հարյուրապատիկից երեքհարյուրապատիկի չափով, կամ կալանքով` առավելագույնը երեք ամիս ժամկետով, կամ ազատազրկմամբ` առավելագույնը մեկ տարի ժամկետով»:

Իսկ ՀՀ քրեական օրենսգրքի 143-րդ հոդվածը պատասխանատվություն է նախատեսում մարդու և քաղաքացու իրավունքներն ու ազատություններն ուղղակի կամ անուղղակի խախտելու համար՝ կախված  քաղաքական կամ այլ հայացքներից, անձնական կամ սոցիալական բնույթի այլ հանգամանքներից, որը վնաս է պատճառել մարդու և քաղաքացու իրավունքներին ու օրինական շահերին: Գտնում ենք, որ արարքում առկա է նաև հայացքներն արտահայտելու հիման վրա խտրականության տարրը»,- ասված է Գևորգ Կոստանյանին և Վլադիմիր Գասպարյանին կազմակերպության ուղղած հաղորդման մեջ:

Թե որքանո՞վ այս հաղորդումը հիմք կհանդիսանա՝ Վաղարշ Աբրահամյանի նկատմամբ քրեական գործ հարուցելու համար, պարզ կդառնա ապագայում, իսկ մինչ այդ պարզապես հիշեցնենք, որ ոստիկանությունն արդեն այս հարցին առիթ ունեցել է անդրադառնալու` հայտարարելով, որ գործ չի հարուցվել, քանի որ հանցագործության մասին հաղորդում չի ստացվել։

Ի դեպ, նույն պատճառաբանությամբ խնդրին չի անդրադարձել նաև ՄԻՊ-ը` հայտնելով, որ վաճառականներից և ոչ ոք շուկայի տնօրենի արաքների մասին բողոք չի ներկայացրել: