Փաստ ինֆո

Ազգային ժողովը մերժեց նախօրեին քննարկված` «Հայ ազգային կոնգրես» խմբակցության կողմից արտահերթ ճանաչված «Արտակարգ դրության իրավական ռեժիմի մասին» օրենքում փոփոխություններ կատարելու մասին օրինագիծը:

Նախագծի ընդունմանը կողմ էին 35, դեմ` 59 և ձեռնպահ` 5 պատգամավոր:

Ինչպես և ակնկալվում էր, ՀՀԿ խմբակցությունը դեմ քվեարկեց: Քվեարկությունից առաջ խմբակցության  քարտուղար Գագիկ Մելիքյանը հայտարարեց, որ իրենք հարցը քննարկել են և գտնում են, որ «Սահմանադրության հետ որևէ խնդիր չկա»:

Հիշեցնենք, որ ՀԱԿ-ի նախագծով, մասնավորապես առաջարկվում է արտակարգ դրության ժամանակ բացառել  Զինված ուժերի օգտագործումը:

Նախագծով առաջարկվում է սահմանել, որ արտակարգ դրության իրավական ռեժիմն ապահովելու նպատակով կարող են օգտագործվել ոստիկանության, ազգային անվտանգության պետական լիազոր մարմինների ուժերն ու միջոցները: Բնական, տարերային ու տեխնոգեն աղետների արդյունքում արտակարգ դրություն հայտարարելու դեպքում կարող են ներգրավվել ՀՀ պաշտպանության պետական լիազոր մարմնի մարդկային ռեսուրսը, տեխնիկան ու տրանսպորտային միջոցները՝ բացառապես առանց զենքի ու զինամթերքի:

Ըստ հեղինակների` գործող օրենքի մի շարք դրույթներ հակասում են Սահմանադրությանը, քանի որ վերջինով սահմանված  են սահմանադրական մարմինների, այդ թվում՝ ՀՀ Նախագահի  սպառիչ լիազորությունները, և նոր լիազորությունների, այն է՝ արտակարգ դրության ժամանակ բանակը ներգրավելու հնարավորության վերապահումն օրենքով սահմանելը հակասահմանադրական է:

Գ.Ջհանգիրյանի հիմնավորմամբ՝ ՀՀ Սահմանադրության համաձայն ռազմական,
զինական ուժ ու միավոր, ՀՀ Զինված ուժերը կարող են օգտագործվել բացառապես ՀՀ-ի վրա զինված հարձակման, դրա անմիջական վտանգի առկայության կամ պատերազմ հայտարարվելու դեպքերում, այն էլ` միայն ռազմական դրություն հայտարարելու պայմանով:

Նախագծի վերաբերյալ կառավարության և ԱԺ գլխադասային՝ Պետական-իրավական հարցերի մշտական հանձնաժողովի կարծիքները  բացասական էին: