Փաստ ինֆո

Ազգային ժողովը 96 «կողմ», 4 «ձեռնպահ» և 4 «դեմ» ձայներով քիչ առաջ առաջին ընթերցմամբ ընդունեց ԱԺ կանոնակարգ-օրենքում լրացումներ կատարելու մասին «Ժառանգություն» խմբակցության անդամների հեղինակած օրինագիծը:

ԱԺ նախագահ Գալուստ Սահակյանը քվեարկության դնելով նախագիծը, այն որակեց որպես «ամենակարևորագույն, որ որևէ պատգամավոր կարգազանց չլինի»:

Ինչպես նախօրեին տեղեկացրել էինք,  նախագծով առաջարկվում է ամրագրել, որ բացակա պատգամավորի փոխարեն գրանցվող եւ/կամ քվեարկող պատգամավորը համարվում է կարգազանց պատգամավոր, որի նկատմամբ նիստը վարողը պետք է ձեռնարկի ԱԺ կանոնակարգ-օրենքով սահմանված կարգապահական միջոցները:

Գործող կանոնակարգով կարգազանց են համարվում այն պատգամավորները կամ Ազգային ժողովի նիստում ներկա անձինք, ովքեր նիստի ընթացքում աղմկում են, վիրավորական արտահայտություններ են անում, չեն կատարում Ազգային ժողովի նիստը վարողի` ԱԺ կանոնակարգ-օրենքից բխող պահանջները եւ կատարում են այս օրենքով սահմանված կարգը խախտող այլ գործողություններ:

Ի դեպ՝ գործող կանոնակարգ-օրենքի համաձայն, կարգազանց պատգամավորի նկատմամբ նիստը վարողը ձեռնարկում է հետեւյալ կարգապահական միջոցները. զգուշացում՝ անունը, ազգանունը հրապարակելով, խոսափողի անջատում, մեկ նիստում խոսափողից հանդես գալու իրավունքից զրկում, հեռացում` մինչեւ տվյալ օրվա ավարտը կայանալիք նիստերից` դահլիճում ներկա լինելուց, զրկում` մինչեւ 6 օր Ազգային ժողովի նիստերի դահլիճում ներկա գտնվելու իրավունքից, բացառությամբ այն օրերի, երբ նիստեր չեն գումարվում: Ընդ որում՝ այս կարգապահական միջոցները, որպես կանոն, նիստը վարողը կիրառում է մեղմից դեպի խիստը: