Փաստ ինֆո

Կնոջը տաք շամփուրով ծեծելու համար 31-ամյա վանաձորցի Արտյոմը Լոռու մարզի ընդհանուր իրավասության դատարանի դատավճռով դատապարտվել է 100 000 ՀՀ դրամի չափով տուգանքի:

Ըստ մեղադրանքի՝ Արտյոմը 2014թ. մայիսի 18-ին՝ ժամը 13:00-ի սահմաններում, վիճաբանել է կնոջ հետ և ձեռքով հարվածներ հասցրել նրա դեմքին և գլխին, այնուհետև տաք շամփուրով չորս անգամ հարվածել է կնոջ ձախ ձեռքին:

Արտյոմին մեղադրանք է առաջադրվել ՀՀ քրեական օրենսգրքի 118-րդ հոդվածով: Նրա նկատմամբ որպես խափանման միջոց է ընտրել չհեռանալու մասին ստորագրությունը:

Նախաքննության և դատաքննության ընթացքում Արտյոմն առաջադրված մեղադրանքում իրեն մեղավոր չի ճանաչել:

Ըստ նրա ցուցմունքի՝ դեպքի օրն իրենց տան խոհանոցում որդու հեծանիվի լապտերը ամրացնելիս է եղել հեծանիվին` բարակ մետաղական տաքացված լարով, հալեցնելու միջոցով: Այդ ժամանակ կինն իրեն հայտնել է, որ հորեղբայրն իրենց հրավիրել է մասնակցելու դստեր հարսանյաց հանդեսին:

Սակայն ինքը կնոջն ասել է, որ չի ցանկանում մասնակցել հարսանիքին, քանի որ չի ցանկանում շփվել նրա հորեղբոր հետ և, բացի այդ, իրենք գումար չունեն նվեր գնելու համար: Կինն իրեն խնդրել է թույլատրել հարսանիք գնալ մոր և եղբոր հետ, սակայն ինքը կրկին մերժել է:

Այդ ժամանակ կինը վիրավորական արտահայտություններ է արել ամուսնու քրոջ և ծնողների հասցեին, վերջիններիս անվանել անբարոյական, իսկ իրեն՝ «չուչել»:

Ամուսինը զայրացրել է և կնոջը սաստել, սակայն վերջինս շարունակել է վիրավորանքները, ասել, որ տղամարդ չէ, իսկ դեռ չծնված երեխան այլ տղամարդուց է:

Այդ ժամանակ ինքը մետաղական բարակ, տաք լարը ձեռքին բռնած` գնացել է դեպի կինը, վերջինիս ասել, որ ձայնը կտրի, չվիրավորի իրեն և ծնողներին, իսկ կինն առաջ է եկել և նույն պահին իր ձեռքի լարը դիպել է վերջինիս ձեռքին:

Սակայն դատարանը գտել է, որ Արտյոմի ցուցմունքը արժանահավատ չէ, և նա նպատակ է հետապնդում խուսափել քրեական պատասխանատվությունից և պատժից:

Տուժող կինն էլ, իր հերթին ցուցմունք տալով, դատարանին հայտնել է, որ շուրջ 6 տարվա համատեղ ամուսնության ընթացքում իր և ամուսնու միջև հաճախակի են եղել վիճաբանությունները, որոնց ժամանակ վերջինս մի քանի անգամ ծեծի է ենթարկել իրեն:

Ըստ կնոջ ցուցմունքի՝ երբ ամուսինը մերժել է իրեն հարսանիք գնալ, ինքը նեղացել է, սակայն ամուսնուն խնդրել է, որ թույլատրի հարսանիքին գնալ մոր և եղբոր հետ, իսկ նա վիրավորել իրեն, անվանել «փողոցային» և արգելել է գնալ հարսանիքին:

Կինը, չցանկանալով վիճաբանել ամուսնու հետ, փոխել է զրույցի թեման և վերջինիս հայտնել, որ որդուն մանկապարտեզում օղակ է անհրաժեշտ, խնդրել է գնել այն: Ամուսինը, զայրանալով դրանից, իրեն հայտնել է, որ օղակ չի գնելու, հարսանիքին չի գնալու և երկու անգամ ձեռքով հարվածել գլխի շրջանում, ապա ձեռքի տաք շամփուրով չորս անգամ հարվածել է իր ձախ ձեռքին:

Կնոջ պահանջն այն է եղել, որ ամուսինը ենթարկվի քրեական պատասխանատվության: