Փաստ ինֆո

Ազգային ժողովի պատգամավորների նախաձեռնությամբ այսօր ժամը 18.30-ին հրավիրված խորհրդարանի արտահերթ նիստը չի կայանա՝ քվորումի բացակայության պատճառով: Այս մասին ԱԺ կանոնակարգ-օրենքով սահմանված երեք ժամվա ավարտին հայտարարեց ԱԺ փոխնախագահ Էդուարդ Շարմազանովը: 

Արտահերթ նիստում ժամը 18.30-ի դրությամբ գրանցվել էր 37 պատգամավոր, դրան հաջորդած երեք ժամվա ընթացքում գրանցվածների թիվն ավելացել էր ընդամենը մեկով: Մինչդեռ նիստը սկսվելու համար անհրաժեշտ էր առնվազն 66 պատգամավորի գրանցումը: Չէին գրանցվել ՀՀԿ խմբակցության անդամները:

Ինչպես ավելի վաղ տեղեկացրել էինք, ԱԺ ոչ իշխանական խմբակցությունների նախաձեռնությամբ հրավիրված արտահերթ նիստի օրակարգում «Շրջանառության հարկի մասին» և «ՀՀ-ում ստուգումների կազմակերպման և անցկացման մասին» օրենքներում լրացումներ ու փոփոխություններ կատարելու մասին օրենսդրական փաթեթն էր:

Հիշեցնենք, որ խնդիրն առնչվում է հոկտեմբերի 1-ից ուժի մեջ մտնող վերանայված շրջանառության հարկին, որն առևտրի ոլորտի և ՓՄՁ-ների ներկայացուցիչների դժգոհության առիթ է դարձել: Շրջանառության հարկի նոր դրույքաչափը սահմանված է 1%՝ նախկին 3.5%-ի փոխարեն, սակայն ձեռքբերված ապրանքներն ամբողջությամբ պետք է փաստաթղթավորմամբ հիմնավորված լինեն:

«Շրջանառության հարկի մասին» օրենքում փոփոխությունների և լրացումների նախագծով, մասնավորապես, առաջարկվում է, որպես անցումային փուլ, մինչև 2016թ. հունվարի 1-ն առևտրական՝ առք ու վաճառքի, գործունեության ոլորտի տնտեսավարող սուբյեկտների համար կիրառել շրջանառության հարկի դրույքաչափի ընտրության կամավորության սկզբունք: Ըստ այդմ, առաջարկվում է տնտեսավարողին հնարավորություն տալ ընտրելու առաջարկվող երկու տարբերակներից մեկը՝ 1% շրջանառության հարկի դրույքաչափ, բայց ձեռքբերված ապրանքների ամբողջությամբ հիմնավորվածություն փաստաթղթավորմամբ, կամ 3.5% շրջանառության հարկի դրույքաչափ՝ առանց փաստաթղթավորմամբ հիմնավորվածության: Բացի այդ, առաջարկվում է նաև շրջանառության հարկ վճարող համարվելու տարեկան շրջանառության շեմը 58.35 մլն ՀՀ դրամից բարձրացնել մինչև 150 մլն ՀՀ դրամ:

ԱԺ ոչ իշխանական խմբակցությունների՝ քառյակի և ՕԵԿ-ի, ներկայացուցիչները հորդորել են  ԱԺ դարպասների մոտ հավաքված ցուցարարներին շարունակել իրենց պայքարը՝ խոստանալով աջակցություն: Պատգամավորները վստահեցրել են, որ կրկին ստորագրահավաք կկազմակերպեն՝ նույն օրակարգով ԱԺ արտահերթ նիստ հրավիրելու համար: