Փաստ ինֆո

ԱԺ «Ժառանգություն», ԲՀԿ, ՀԱԿ խմբակցությունների ներկայացուցիչները, այսօր հանդիպելով խորհրդարանի շենքի մոտ բողոքի ակցիա իրականացնող երևանյան տոնավաճռների աշխատակիցների հետ, խոստացան շրջանառության մեջ դնել «Շրջանառության հարկի մասին» օրենքի նոր` այլընտրանքային նախագիծ, որը ՓՄՁ ներկայացուցիչներին հնարավորություն կտա ինքնուրույն ընտրություն կատարել` աշխատել հին օրենքով և վճարել 3.5 % հարկ` չներկայացնելով պահանջվող փաստաթղթերը, թե ներկայացնել դրանք և վճարել 1 % հարկ:

Այս ընտրության իրավունքն օրենքով ամրագրելու համար խորհրդարանական ոչ իշխանական եռյակը վաճառականներին խոստացավ ԱԺ-ում ստորագրահավաք կազմակերպել՝ «Շրջանառության հարկի մասին» նոր օրենքը հետ կանչելու եւ դրանում առաջարկվող փոփոխություններն արտահերթ քննարկման դնելու համար։

ԱԺ պատգամավորներ, եռյակի ներկայացուցիչներ Միքայել Մելքումյանը, Արամ Մանուկյանն ու Տիգրան Ուրիխանյանը խորհրդարանի մուտքի մոտ հավաքվածներին խոստացան ստորագրահավաքն սկսել հենց այսօրվանից:

Հոկտեմբերի 1-ից գործարկվող նոր օրենքի տրամաբանությունը հետևյալն է. գործարարը պետք է իր ամբողջ ապրանքաշրջանառությունը փաստաթղթավորված տարբերակով ներկայացնի հարկային մարմիններին և փոխարենը վճարի ավելի ցածր հարկ՝ ներկայիս 3.5-ի փոխարեն 1%:

Առևտրականները, սակայն, պնդում են, որ դա հնարավոր չէ անել, քանի որ հաճախ նրանք, ումից իրենք ապրանք են ձեռք բերում, հրաժարվում են գործարքն արձանագրել փաստաթղթերով:

Ընդ որում, այս դեպքում խոսքը հատկապես խոշոր բիզնեսի ներկայացուցիչների մասին է:

Կառավարությունն էլ չի թաքցնում, որ օրենքը հենց այդ նպատակն էլ հետապնդում է` փոքրերի ձեռամբ խոշորներին հանել ստվերից: