Փաստ ինֆո

 Մեղադրող Գևորգ Գևորգյանն այսօր միջնորդեց ավազակային հարձակման, տուժող կնոջն ու նրա անչափահաս դստերն առևանգելու, կնոջը բռնաբարելու, ընդհանուր առմամբ ՀՀ քրեական օրենսգրքի հինգ հոդվածներով մեղադրվող նախկին ոստիկան Էդգար Վարագյանին դատապարտել ընդհանուր առմամբ 18 տարվա ազատազրկման:

Մեղադրողը հաստատված համարեց նրան ներկայացված մեղադրանքը ողջ ծավալով: Մեղադրողն իր մեղադրական ճառում նշեց, որ նախաքննական մարմինը ճիշտ քրեաիրավական գնահատական է տվել մեղսագրվող արարքներին, դրանք հաստատված են փոխկապակցված ապացույցների բավարար ամբողջությամբ, մեղմացուցիչ ու ծանրացուցիչ հանգամանքներ չկան:

Պաշտպանական կողմը միջնորդեց մեկ շաբաթ ժամանակ տրամադրել՝ պաշտպանական ճառերը նախապատրաստելու համար:

Մինչ դատաքննության ավարտի մասին հայտարարելը, դատարանում հետազոտվեցին ամբաստանյալի այլուրեքության մասին հայտարարած կին վկայի հեռախոսահամարների վերծանումները:

Վկան հայտարարել էր, որ դեպքի օրն ինքը Էդգար Վարագյանի հետ է եղել, տարբեր վայրեր են այցելել, ապա ավելի ուշ՝ երեկոյան, միասին գնացել են Նորքի զանգվածում գտնվող Վարագյանի վարձակալած բնակարան ու այնտեղ մնացել մինչև առավոտ:

Եթե տարբեր վայրեր կատարելու մասին հայտարարությունը ըստ էության չէր հերքվում վերծանումներով, ապա Նորքի զանգվածում գտնվելը, մեղմ ասած, չէր հաստատվում՝ վերծանումների համաձայն. վկայի հեռախոսահամարից ելքային զանգեր եղել են Շենգավիթ վարչական շրջանի տարածքից:

Դատական նիստում «մեղադրանքներ» հնչեցրեցին նաև ամբաստանյալի ծնողները՝ մեղադրողի հասցեին: Ըստ նրանց՝ մեղադրողը ոչ օբյեկտիվ մոտեցում ունի, «շատ վատ է տրամադրված» ամբաստանյալի հանդեպ, դատարանում հանդես է գալիս որպես տուժողի փաստաբան: Մեղադրողը ասվածը որակեց որպես հերյուրանք, իսկ դատարանն էլ պարզաբանեց, որ մեղադրողն ու տուժողը մեկ ընդհանուր՝ մեղադրանքի կողմում են հանդես գալիս, ուստի զարմանալի չէ, որ նույն դիրքորոշումն ունեն մեղադրանքի վերաբերյալ:

Էդգար Վարագյանը սահուն անցում կատարեց ենթադրաբար Շանթ Հարությունյանի և մյուսների գործին, որի հետ միակ ընդհանրությունն այն է, որ այդ գործով նույնպես նույն մեղադրողն է մեղադրանքը պաշտպանում, և հայտարարեց. «15 տարեկան անմեղ երեխայի համար ազատազրկում պահանջեց». խոսքը, ենթադրաբար, Շանթ Հարությունյանի անչափահաս որդու՝ Շահեն Հարությունյանի պատժաչափի վերաբերյալ մեղադրողի միջնորդության մասին է:

Ապա ամբաստանյալն անցավ «դատաքննությունը լրացնող» միջնորդություններին: Մասնավորապես, միջնորդեց, իր արտահայտությամբ, մարմնական հետազոտություն անցկացնել՝ պարզելու համար իր սեռական օրգանների հատվածը երբևէ սափրված եղե՞լ է, թե՝ ոչ:

Մեղադրողն առարկեց միջնորդության դեմ՝ ընդգծելով, որ ժամանակին մարմնի քննություն է կատարվել՝ ընթերակաների ներկայությամբ, կատարվել է դատաբժշկական փորձաքննություն, որոնք հետազոտվել են դատարանում:

Ամբաստանյալը փորձեց վիճարկել նաև գենետիկական փորձաքննության արդյունքները: Դատարանը մերժեց միջնորդությունները, քանի որ միջնորդությունների բավարարման համար բավարար պատճառաբանություններ չներկայացվեցին: Նույն հիմնավորմամբ մերժվեց նաև ամբաստանյալի միջնորդությունը՝ տուժողի, որին նա համառորեն «ինքնակոչ տուժող» էր անվանում, մի շարք այլ վկաների հեռախոսահամարների բովանդակային վերծանումները պահանջելու մասին:

Ամբաստանյալը միջնորդեց դատարան հրավիրել ու հարցաքննել նաև երեք անձանց, որոնց նույնպես, ըստ նրա, ժամանակին ձերբակալել են նույն գործի շրջանակում:

Մեղադրողը հայտարարեց, որ որևէ այլ անձ գործի շրջանակում չի ձերբակալվել: Դատարանն էլ արձանագրեց, որ գործը քննվում է մեղադրանքի շրջանակում՝ հավելելով, որ դատարանը չունի դատաքննության ժամանակ նաև նախաքննություն անցկացնելու լիազորություն: