Փաստ ինֆո

Սեպտեմբերի 9-ին Ազգային ժողովի Բաղրամյան փողոցի մուտքի մոտ ԱԺ անվտանգության ծառայության պետ Կարեն Հայրապետյանի կողմից լրագրող Մարինե Խաչատրյանի մասնագիտական գործունեությանը խոչընդոտելու փաստով ՀՔԾ-ում այդպես էլ քրեական գործ չհարուցվեց:

Ինչպես «Փաստինֆո»-ին հայտնեց Հատուկ քննչական ծառայության մամուլի քարտուղար Լուսինե Մարգարյանը, գործի հարուցումը մերժվել է՝ հանցակազմի բացակայության հիմքով:

Հիշեցնենք՝ սեպտեմբերի 9-ին ԱԺ անվտանգության ծառայության պետ Կարեն Հայրապետյանը նախ պոկել էր ԱԺ-ի դարպասներին փակցված «Բարև Ռոբ» գրությամբ պաստառը, ապա հարվածել ակցիան նկարահանող լրագրողի ձեռքին ու գետնին գցել նկարահանող սարքը: Միջադեպը ներկայացնող տեսանյութում այս ամենից հետո ԱԺ անվտանգության ծառայության պետն արդարանում է, որ ոչ թե բռնություն է գործադրել, այլ պարզապես ձեռքով ասել է լրագրողին, որ մի կողմ տանի տեսանկարահանող սարքը:

Իսկ միջադեպից 3 օր անց` սեպտեմբերի 12-ին, ՀՀ գլխավոր դատախազ Գևորգ Կոստանյանը հանձնարարել էր «մասնագիտական գործունեություն ծավալելու ընթացքում, լրագրող Մարինե Խաչատրյանի և ԱԺ անվտանգության ծառայության պետ Կարեն Հայրապետյանի միջև տեղի ունեցած միջադեպի վերաբերյալ մամուլի հրապարակումներն ուղարկել Հատուկ քննչական ծառայություն՝ ՀՀ  քրեական դատավարությամբ նախատեսված կարգով  ընթացքը լուծելու համար»:

Ի դեպ, գործի հարուցումը մերժելու՝ ՀՔԾ-ի որոշումն այսօր քննադատել են մի շարք լրագրողական կազմակերպություններ:

«Մեզանում ձեւավորվում է արատավոր ավանդույթ. լրագրողների գործունեության խոչընդոտման կամ նրանց նկատմամբ բռնութան մասին հաղորդում ստանալուց հետո ՀՀ դատախազությունը հանձնարարում է ՀՔԾ-ին՝ զբաղվել միջադեպով, իսկ վերջինս կոծկում է գործը՝ ստանդարտ «հանցակազմի բացակայության» հիմնավորմամբ։ Եվ դա այն դեպքում, երբ բռնության ու խոչընդոտման փաստերը նկարահանված եւ տեղադրված են համացանցում, բազմաթիվ ԶԼՄ-ներում»,- ասված է հայտարարության մեջ:

ՀՔԾ-ն, հայտարարության հեղինակների համոզմամբ, այս գործելոոճով իր պաշտպանության տակ է առնում բռնություններ իրականացնողներին` խորացնելով հիասթափությունն ու անվստահությունը իրավապահ մարմինների նկատմամբ: