Փաստ ինֆո

«Մեր ակնկալիքը այն 12 մլրդ-ը չէ, որ իրենք վճարում են, մեր ակնկալիքը շատ ավելի շատ է խոշորից»,- «Փաստինֆո»-ի խնդրանքով մեկնաբանելով Շրջանառության հարկի մասին օրենքում կատարված փոփոխության նպատակն ու դրա շուրջ փոքր ու միջին բիզնեսի ներկայացուցիչների դժգոհությունը՝ ասաց ֆինանսների փոխնախարար Վախթանգ Միրումյանը:

Իսկ մեր հարցին, թե որքա՞ն է պետության ակնկալիքը խոշոր բիզնեսից, փոոխնախարարը կոնկրետ պատասխան չտվեց` ասելով միայն` «շատ է»:

Հարցը մեկ անգամ ևս պնդելուց հետո էլ, սակայն, այդպես էլ ֆինանսների փոխնախարարից պատասխան չստացանք, թե, ի վերջո, ի՞նչ հաշվարկների հիման վրա է հիմնված նոր օրենքը և ի՞նչ չափով կօգնի այն կրճատել խոշոր բիզնեսի ներկայիս ստվերային շրջանառությունը:

«Խոշորներ կան բոլոր ոլորտներում, շատ քիչ ոլորտներ կան, որտեղ ստվեր չկա: Մենք հեռու ենք այն տեսակետն արտահայտելուց, որ այստեղ ստվեր չկա: Դրա համար է այս ամբողջը կատարվում: Կենկրետ գնահատականներ մենք չունենք, բայց մենք կարծում ենք, որ կա ստվեր և դռևս վաղ է մտածել, որ ստվերը գտնվում է իր բնականոն միջակայքում, որն ընդունված է ամբողջ աշխարհում»,- ասաց Վախթանգ Միրումյանը:

Հիշեցնենք՝ արդեն մի քանի օր է ինչ երևանյան տոնավաճառներում առևտուր անող փոքր բիզնեսի ներկայացուցիչները բողոքում են հոկտեմբերի 1-ից ուժի մեջ մտնող «Շրջանառության հարկի մասին» ՀՀ օրենքի դեմ` կառավարությունից պահանջելով վերանայել այս նոր հարկատեսակի կիրառությունը:

Հոկտեմբերի 1-ից գործարկվող օրենքի տրամաբանությունը հետևյալն է. գործարարը պետք է իր ամբողջ ապրանքաշրջանառությունը փաստաթղթավորված տարբերակով ներկայացնի հարկային մարմիններին և փոխարենը վճարի ավելի ցածր հարկ՝ ներկայիս 3.5-ի փոխարեն 1%:

Առևտրականները, սակայն, պնդում են, որ դա հնարավոր չէ անել, քանի որ հաճախ նրանք, ումից իրենք ապրանք են ձեռք բերում, հրաժարվում են գործարքն արձանագրել փաստաթղթերով: Ընդ որում, այս դեպքում խոսքը հատկապես խոշոր բիզնեսի ներկայացուցիչների մասին է:

Կառավարությունն էլ չի թաքցնում, որ այս փոփոխության նպատակն իսկապես ՓՄՁ-ի միջոցով խոշոր բիզնեսին ստվերից դուրս բերելն է: Այսինքն` փոքր բիզնեսը պետք է ստիպի խոշորին իրեն հանձնված ապրանքի յուրաքանչյուր խմբաքանակի դիմաց համապատասխան փաստաթուղթ տալ:

Հակառակ դեպքում՝ ՓՄՁ ներկայացուցիչները մտավախություն ունեն, որ այդ նույն խոշորների փոխարեն տուգանքների կենթարկվեն հենց իրենք:

«Այնպես չէ, որ վաղը տեսուչը գնալուէ տեսնի սուբյեկտը չունի այդ փաստաթուղթը, ասի` վերջ, դու գնացիր տույժ ու տուգանքների տակ: Դրա համար ի՞նչ ենք ասում: Ասում ենք` առաջին անգամ քեզ միայն նախազգուշացնում են, ասում ենք` մի' արա առանց փաստաթղթի, փաստաթուղթ ուզի: Փաստաթուղթ ուզում ես, չեն տալիս, գոնե մի հատ գրիր, որ այսինչ սուբյեկտը չի տալիս, որ մենք նրա նկատմամբ գործողություն իրականացնենք, որովհետև մի այլ բան է, երբ որ տեսականորեն ասում են` ինչո՞ւ դուք չգիտեք, մի այլ բան է, երբ որ իրավական հիմք եք տալիս: Հիմա մենք ասում ենքч իրավական հիմք տվեք մեզ, որովհետև ցանկացած բանավոր իմացած հեշտությամբ դատարաններում ջարդվում է»,- ասաց Վախթանգ Միրումյանը:

Իսկ մինչ ֆիննախում խոշորների դեմ պայքարելու իրավական հիմքեր են փնտրում, փոքր բիզնեսն արդեն իսկ խոշորների կողմից ճնշումների է ենթարկվում:

Ոսկու շուկայի սեփականատերն արդեն այս ուղղությամբ առաջին քայլերն արել է` ջարդելով ու փողոց նետելով բողոքի ակցիային մասնակցող, իր շուկայում տաղավար վարձակալած, ոսկու վաճառքով զբաղվող մի քանիսի վաճառականների սեղանիկները:

Բայց ՓՄՁ պայքարն էլ այսքանով չի ավարտվել: Կառավարությունից  հույսները կտրելովч տոնավաճառների աշխատակիցները որոշել են երկուշաբթի օրն իրենց բողոքը ներկայացնել արդեն օրենսդիր իշխանությանը` հավաքվելով ԱԺ-ի շենքի մոտ: