Փաստ ինֆո

ԼՂՀ նախագահ Բակո Սահակյանն ընդունել է Ստեփանակերտ քաղաքի հիմնադրման 91-րդ տարեդարձին նվիրված տոնական միջոցառումներին մասնակցելու նպատակով Արցախ այցելած Երեւանի քաղաքապետ Տարոն Մարգարյանին: Այս մասին տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:

Ողջունելով հյուրերին՝ ԼՂՀ նախագահը, կարեւորելով երեւանյան պատվիրակության մասնակցությունը Ստեփանակերտի տոնին, ընդգծել է, որ իսկապես հաճելի է արձանագրել, որ ինչպես հայկական երկու հանրապետությունների մայրաքաղաքների, այնպես էլ ԼՂՀ շրջանների ու Երեւանի վարչական շրջանների միջեւ հաստատված համագործակցությունը ջերմ է ու արդյունավետ. «Երեւանի քաղաքապետարանը, իրոք, ուրույն եւ կարեւոր դերակատարում ունի Արցախի կյանքում, ինչը, համոզված եղեք, առանձնակի է կարեւորվում եւ գնահատվում մեր կողմից: Ու ես վստահ եմ, պարոն քաղաքապետ, որ նաեւ Ձեր անմիջական ջանքերի շնորհիվ ինչպես Երեւանի եւ Ստեփանակերտի, այնպես էլ Երեւանի վարչական շրջանների ու Արցախի շրջանների միջեւ համագործակցությունն էլ ավելի կամրապնդվի ու կընդլայնվի»,- ընդգծել է ԼՂՀ նախագահը:

Շնորհակալություն հայտնելով ջերմ ընդունելության համար` քաղաքապետ Տարոն Մարգարյանը նախ շնորհավորել է ԼՂՀ նախագահին Ստեփանակերտի օրվա կապակցությամբ եւ ընդգծել, որ Երեւանի քաղաքապետարանը շարունակելու է սերտորեն համագործակցել Ստեփանակերտի եւ Արցախի շրջանների հետ՝ իր լիազորությունների շրջանակում, ըստ ամենայնի փորձելով աջակցել տարբեր նախաձեռնություններին ու ծրագրերին. «Մեր կողմից, պարոն նախագահ, իսկապես առանձնակի է կարեւորվում Արցախի հետ հարաբերությունների խթանումն ու ընդլայնումը, որը, ինչպես արդարացիորեն նշեցիք նաեւ Դուք, բավականին արդյունավետ զարգացումներ է գրանցում: Ու վստահ եղեք, որ այն լինելու է շարունակական՝ ի բարօրություն թե՛ Երեւանի ու երեւանցիների եւ թե՛ Արցախի ու արցախահայության»,- նշել է Տարոն Մարգարյանը:

Հանդիպման վերջում Երեւանի քաղաքապետը ԼՂՀ նախագահ Բակո Սահակյանին եւ Հայ առաքելական եկեղեցու Արցախի թեմի առաջնորդ Պարգեւ Արքեպիսկոպոս Մարտիրոսյանին պաշտոնապես հրավիրել է հոկտեմբերի 11-12-ին մասնակցելու Էրեբունի-Երեւանի 2796-ամյակի տոնակատարություններին:

Տարոն Մարգարյանն ընդգծել է, որ Երեւանը եւս մեծ պատրաստակամությամբ է պատրաստվել տոնին եւ արել է հնարավորը, որպեսզի տոնական այդ օրը ինչպես երեւանցիների, այնպես էլ մայրաքաղաքի հազարավոր հյուրերի համար իսկապես տոնախմբության վերածվի: